Panariti: Për koalicionin me PS do vendosim në prill, duhet një analizë
Fati i koalicionit PS-LSI do të vendoset në muajin prill, por deri atëherë duhet bërë një analizë. Ky është qëndrimi i ministrit të Bujqësisë, Edmond Panariti, i cili është bërë pjesë e debatit në distancë të lindur ditët e fundit mes dy forcave kryesore në qeverisjen e vendit. “Koalicioni PS- LSI funksionon në bazën e një pakti qeverisës, që është rezultat i marrëveshjes së 1 prillit dhe LSI- ja ka dëshmuar se i përmbahet këtij koalicioni. Ju jeni të interesuar se çfarë do të ndodhë në të ardhmen, por ne kemi kohë për arsye se regjistrimi i koalicioneve do të bëhet në mes të prillit. Në këtë periudhë, dy partitë do të bëjnë bilancin e qeverisjes dhe do të hartojnë kriteret, mbi bazën e të cilave do të ecin në të ardhmen”, deklaroi Panariti. Por, pavarësisht marrëveshjes politike, ministri i Bujqësisë deklaron se gjatë qeverisjes me PS-në ka pasur edhe luhatje në koalicion. Panariti ka shprehur edhe pakënaqësitë e tij sa u takon fondeve që janë përcaktuar në buxhet për sektorin e bujqësisë. “Unë shoh që bashkëpunimi deri tani ka qenë konstruktiv. Natyrisht ka pasur luhatjet e tij, pasi përqasjet tona për disa prob- leme kanë qenë të ndryshme, sepse ne disa çështje i kemi të një rëndësie të veçantë, sidomos sa i përket bujqësisë, për të cilën theksoj se fondet për të duhet të jenë më të mëdha. Pavarësisht se kanë qenë në rritje krahasuar me më parë, ne nuk mund të ecim me krahasime”, tha Panariti. Ditët e fundit janë disa deklarata nga përfaqësuesit e të dyja forcave politike që deklarojnë se në zgjedhje do të ishte mirë që të hynin edhe të ndara nga njëra- tjetra. Kështu, deputetja Silva Caka deklaroi se do të ishte mirë që PS- ja e LSI- ja të mos hynin si pjesë e një koalicioni të përbashkët në zgjedhjet e ardhshme. Pak ditë më parë, edhe ministri i Drejtësisë, Ylli Manjani, deklaroi se në pushtet LSI- ja ka ardhur me Ben Blushin dhe jo me Shpëtim Idrizin e PDIU-së. Përplasjet brenda shumicës u vunë re edhe në Komisionin e Reformës Zgjedhore, ku kreu i Grupit të Lëvizjes Socialiste për Integrim, Petrit Vasili, dhe kryetari i Partisë Drejtësi, Integrim dhe Unitet, Shpëtim Idrizi, u larguan nga mbledhja e Komisionit të Reformës Zgjedhore, duke i lënë socialistët vetëm në votimin e ndryshimeve për reformën.