Vlahutin premtoi të sjellë ekspertë nga BE për Kodin
Përfaqësuesit e partive të vogla parlamentare deklaruan pas takimit me ambasadoren e BE- së në Tiranë, Romana Vlahutin, se kjo e fundit do të sjellë ekspertë të huaj në Shqipëri për të testuar përdorimin e teknologjisë në zgjedhje. Kanë qenë përfaqësuesit e këtyre partive që në shkresën me kushtet e tyre për realizimin e zgjedhjeve me standarde në Shqipëri kishin vendosur si kryekërkesë: Realizimin e identifikimit biometrik të zgjedhjeve, votimin elektronik dhe numërimin elektronik të votave. Për këtë arsye, misioni i Bashkimit Europian në Shqipëri ka marrë përsipër që në javët në vazhdim të sigurojë një takim në nivel ekspertësh për të dhënë një përgjigje në lidhje me risqet dhe mundësitë që ka për të realizuar një proces elektronik votimi në vendin tonë. Deputetja e LIBRA- s, Mimoza Hafizi, e cila ishte edhe vëzhguese e zgjedhjeve të fundit presidenciale në SHBA, pas takimit deklaroi se minimalisht numërimi elektronik i votave mund të jetë një proces i aplikueshëm në zgjedhjet e 18 qershorit. “Ne kemi bindjen që numërimi elektronik është i mundshëm të realizohet në zgjedhjet e ardhshme. Kërkesa kryesore që pranohet shumë mirë është ajo për administrimin elektronik të zgjedhjeve të ardhshme, siç është çështja e numërimit elektronik. Kjo është një çështje që mund të shtensionojë shumë situatën në zgjedhjet e ardhshme. Nga Bashkimi Europian u premtua se do të bëhet presion ndaj partive të mëdha”, deklaroi Hafizi. Përdorimi i teknologjisë u mbështet edhe nga përfaqësuesit e PDIU- së.