Serbia kërcënon me luftë, Majko: Jemi më të aftë se për paqe
Kryeministri Vuçiç: Ky është paralajmërimi i fundit, ne dërguam tren dhe jo tank
Presidenti serb, Tomisllav Nikolic, për herë të parë pas 18 vitesh ka përmendur futjen e ushtrisë serbe në territorin e Kosovës, pas ndalimit të hyrjes në Mitrovicë të trenit provokues me simbole nacionaliste, me pretendimin se “shqiptarët kërkojnë luftë”.
Sipas Nikoliç, “çdo tentim i ardhshëm i institucioneve të përkohshme për të shkaktuar konflikt, siç ishin ngjarjet lidhur me trenin, do të përfundojë keq... Ne do të dërgojmë ushtri për të mbrojtur serbët në Kosovë”. Mediat serbe e kanë cituar atë, edhe me fjalët: “Le të mendojnë për këtë edhe shqiptarët, edhe aleatët e tyre. Ne do të veprojmë konform Kushtetutës së Serbisë. Kosova dhe Metohia nga pikëpamja ndërkombëtare- juridike janë pjesë e Serbisë”. Kështu u shpreh ai para gazetarëve pas mbledhjes së Këshillit Serb të Sigurisë. “Shfaqja e ROSU-t ( Policia Speciale e Kosovës) ishte shenjë se shqiptarët deshën luftë”, tha Nikoliçi. Një tren i dekoruar në detaje nacionaliste serbe u nis të shtunën nga Beogradi me qëllim për të hyrë në Veriun e Kosovës, por u ndal në kufi me një pengesë që shkaktoi një përshkallëzim dramatik të tensioneve.
QËNDRIMET Zyrtarët e Kosovës kishin protestuar më parë se treni ishte shkelje e sovranitetit të vendit të tyre dhe premtuan të mos e lejojnë atë të hyjë në Kosovë. Kryeministri serb, Aleksandar Vuçiç, urdhëroi që treni të ndalojë në qytetin serb të Rashkës, kur po i afrohej kufirit me ish- krahinën e Serbisë, duke thënë se shqiptarët etnikë të Kosovës ishte përpjekur për të minuar hekurudhën. Policia e Kosovës i ka denoncuar me forcë akuzat e tilla, por tha se ata e kishin kontrolluar hekurudhën dhe nuk kanë gjetur eksplozivë. Kryeministri i Kosovës, Isa Mustafa, tha se ai kishte kontaktuar me Shtetet e Bashkuara dhe Bashkimin Europian për të shprehur shqetësimet e vendit të tij. “Unë besoj se kthimi prapa i trenit ishte veprimi i duhur dhe hyrja e tij në Republikën e pavarur dhe sovrane të Kosovës nuk do të lejohet”, tha ai në një konferencë shtypi mbrëmjen e së shtunës. TRENI I PROVOKIMEVE
Treni i bërë në Rusi është pikturuar me flamujt serbë, portrete të krishtera ortodokse fetare, pamje të manastireve dhe qyteteve mesjetare dhe në të është gdhendur “Kosova është serbe” në 20 gjuhë të botës. Stafi kishin veshje me ngjyrat e flamurit kombëtar serb. Udhëtimi promovues në Kosovë i së shtunës ishte i pari nga Beogradi, kryeqyteti serb, drejt qytetit verior të Mitrovicës në Kosovë, që nga lufta 1998- 99. Treni më vonë u kthye në drejtim të Beogradit.
AKUZAT Në një konferencë urgjente shtypi në Beograd të shtunën, Vuçiç ka akuzuar qeverinë e Kosovës në Prishtinë mbi planet për të arrestuar shoferin e trenit dhe udhëtarët. “Kjo ishte një ambicie për të provokuar një konflikt, për të filluar një konflikt më të gjerë në këtë territor që ne e konsiderojmë si i yni”, tha Vuçiç. “Ishte vendimi im për të ndaluar trenin në Rashkë, për të ruajtur lirinë dhe jetën e popullit tonë, për të parandaluar një konflikt më të gjerë dhe për të treguar se ne duam paqe”. Ai paralajmëroi shqiptarët në Kosovë të mos sulmojnë pakicën serbe të Kosovës, “Ky është paralajmërimi im i fundit për shqiptarët, sepse Serbia nuk do t’i lejojë këto sulme. “Ne kemi dërguar një tren, jo një tank”, tha Vuçiç. Kur treni u nis nga Beogradi, Marko Gjuriç, i cili kryeson zyrën e Qeverisë serbe për Kosovën, e përshkroi lidhjen hekurudhore si të rëndësishme për Veriun e Kosovës. “Kjo është si një ekspozitë e lëvizshme që paraqet trashëgiminë tonë kulturore”, tha ai. Përplasja e pikëpamjeve erdhi mes tensioneve të rritura tashmë në mes të Serbisë dhe Kosovës pas ndalimit të kohëve të fundit në Francë të Ramush Haradinajt, ish- kryeministër i Kosovës, në një urdhërarresti nga Serbia. Kosova e ka quajtur urdhrin jolegjitim dhe i kërkoi Francës ta injorojë atë.