Meta në SHBA, vlerësohet Reforma në Drejtësi
Ndihmëssekretari Brownfield: Presim bashkëpunim të mëtejshëm
Kryeparlamentari Ilir Meta, gjatë vizitës në Shtetet e Bashkuara të Amerikës, ka marrë mbështetjen e ndihmëssekretarit të Shtetit, William Brownfield, për zbatimin e Reformës në Drejtësi. Gjatë takimit kokë më kokë, ndihmëssekretari Brownfield vlerësoi miratimin e Reformës kushtetuese në Drejtësi me konsensus të gjerë, si hap që shtron rrugën për një implementim të shpejtë dhe efikas të saj. Zyrtari i DASH konfirmoi vazhdimin e mbështetjes së administratës amerikane në fazën delikate të zbatimit të reformës, për një proces të besueshëm dhe të qëndrueshëm. “Më duhet të them se Departamenti i Shtetit, veçanërisht zyra e forcimit të ligjit, ndihet shumë krenare për bashkëpunimin midis dy qeverive tona, duke mbështetur Reformën në Drejtësi në Shqipëri, miratimin e ligjeve të reja, apo reformat kushtetuese. Dhe ne presim bashkëpunim të mëtejshëm edhe në fazën e implementimit të reformave, në mënyrë që të mund të punojmë së bashku edhe në vazhdim, për të siguruar institucione të forta, që janë të afta të garantojnë demokracinë, sig- urinë dhe prosperitetin për popullin shqiptar”, ka thënë ndihmëssekretari i Shtetit. Gjatë takimit, Meta mori konfirmimin për mbështetjen e SHBA- ve për implementimin e Byrosë së Hetimit dhe SPAK- ut dhe gatishmërinë për ta monitoruar nga afër këtë proces. “Ishte kënaqësi e veçantë për t’u ritakuar me ndihmëssekretarin e Departamentit të Shtetit, ambas- adorin William Brownfield, për ta informuar atë lidhur me ecurinë e suksesshme të Reformës në Drejtësi. Jo vetëm me miratimin konsensual të ndryshimeve kushtetuese, por edhe me miratimin e ligjeve të tjera kryesore dhe me vullnetin për të zbatuar sa më shpejt këtë reformë, përmes ligjit për vetingun, por edhe përmes ngritjes së të gjitha institucioneve të tjera. Sidomos, ndihmës dhe mbështetjes për ngritjen institucioneve të reja, të Byrosë së Hetimit, të Prokurorisë Speciale për luftën kundër korrupsionit dhe mbështetjes që i japin SHBAtë misionit të Operacionit Ndërkombëtar të Monitorimit, që është vendimtar për suksesin tonë të përbashkët në realizimin e kësaj reforme”, ka thënë Meta gjatë prononcimit për mediat pas takimit me Brownfield.