Zbardhet vendimi, i hapet rruga vetingut për gjyqtarët
“Kontrolli i pasurisë, të mos nisë pa u ngritur organet e vetingut”
Ligji i vetingut do të hyjë në fuqi menjëherë pas botimit të vendimit të Gjykatës Kushtetuese në Fletoren Zyrtare.
Ky është përcaktimi i bërë nga Gjykata Kushtetuese në vendimin e saj të zbardhur për ligjin e vetingut, ku ajo me 6 vota ka rrëzuar kërkesën e Partisë Demokratike dhe të Unionit të Gjyqtarëve. Afatin e saktë të botimit të këtij vendimi në Fletoren Zyrtare nuk e përcakton askush dhe kjo do të varet nga shpejtësia proceduriale e institucioneve për ta dërguar dhe botuar atë.
Por megjithëse vendimi i Gjykatës Kushtetuese rrëzon të 13 pikat e opozitës, interpretimi kushtetues u njeh organeve të vetingut autoritet të plotë në vendimmarrje gjatë vlerësimit të gjyqtarëve dhe prokurorëve. Sipas opozitës, ky autoritet është vënë në dyshim nga ligji, i cili ua merr kompetencat organeve të vetingut dhe ua jep disa organeve ekzistuese, Inspektoriatit të Pasurive apo Drejtorisë së Kontrollit të Figurës. Në rastin e kontrollit të pasurisë, Gjykata Kushtetuese vlerëson se kompetencat e Inspektoriatit nuk bien ndesh me organet e rivlerësimit dhe nuk e cenojnë në thelb atë. Gjykata Kush- tetuese nuk bën të njëjtin interpretim për Drejtorinë që bën kontrollin e figurës. Në mënyrë që procesi i rivlerësimit të mos komprometohet duke u kontrolluar nga pushteti ekzekutiv, Gjykata vlerëson se në grupet e punës për kontrollin e fig- urës duhet të marrë pjesë edhe një përfaqësues nga organi i vetingut.
Me interpretimin e vet, Gjykata Kushtetuese ka ndaluar strukturat ekzistuese të kontrollit të pasurisë, figurës dhe vlerësimit të gjyqtarëve dhe prokurorëve që të funksionojnë pa u ngritur më parë organet e vetingut. Sipas Gjykatës Kushtetuese, këto institucione nuk mund ta ushtrojnë veprimtarinë e tyre jashtë mbikëqyrjes dhe kontrollit të organeve të vetingut. Gjykata vlerëson se vetëm duke përmbushur këtë kërkesë, do të mund të garantohet respektimi i parimit të ndarjes së pushteteve dhe do të parandalohet ushtrimi i kompetencave ligjore në mënyrë të pakontrolluar nga ana e organeve ekzistuese. Kjo do të thotë se edhe pse ligji do të hyjë në fuqi në fillim të sh- kurtit, Inspektoriati i Pasurive dhe Drejtoria e Kontrollit të Figurës nuk mund të kryejnë asnjë veprim pa u ngritur më parë organet e vetingut, që në rastin më të mirë, pritet të miratohen nga Parlamenti në kulmin e fushatës elektorale.