Totozani: Ja njoftimet për ngritjen e komisioneve ad hoc
Pas debateve në Akademinë e Shkencave për përfundimin e afateve për përzgjedhjen e kandidatëve për në komisionet ad hoc të përzgjedhjes së anëtarëve për në KLGJ dhe KLP, Avokati i Popullit, Igli Totozani, bëri publike korrespondencën e tij me dy institucionet nga të cilat priten kandidaturat. Totozani i ka dërguar një njoftim paraprak në datën 12 janar 2017 Kryetarit të Akademisë së Shkencave, Myzafer Korkuti, dhe Kryetarit të Këshillit të Lartë Drejtues të Dhomës Kombëtare të Avokatisë, Maksim Haxhia, ku i lajmëron se duhet të përgatiten për procesin e propozimit dhe përzgjedhjes së kandidatëve për anëtarë në Komisionin e Pavarur ad hoc, për verifikimin paraprak të kandidatëve për anëtarë të Këshillit të Lartë Gjyqësor, si dhe për në Komisionin e Pavarur ad hoc, për verifikimin paraprak të kandidatëve për anëtarë të Këshillit të Lartë të Prokurorisë.
Ndërsa në letrën e dytë, të dërguar dje, më 18 janar 2017, Avokati i Popullit i njofton dy institucionet që të nisin zyrtarisht procesin, duke u kujtuar se afati kohor për përmbushjen e këtij detyrimi ligjor është 5 ditë. Ky reagim i Avokatit të Popullit erdhi pas debateve të nxitura në Akademinë e Shkencave, kur kryetari i kësaj akademie, Myzafer Korkuti, u kishte kërkuar anëtarëve të saj të votonin kandidatët që Kryesia propozonte për shkak të kohës së pamjaftueshme në dispozicion për një proces të hapur diskutimi dhe propozimi. “Duke qenë se jemi në përfundim të afatit ligjor prej 5 ditësh të parashikuar nga ligji në fjalë, se anëtarët e propozuar duhet të jenë akademikë të shkencave shoqërore, se të drejtën e zgjedhjes me shumicë të thjeshtë të tyre e ka Asambleja e Akademisë së Shkencave, po ju drejtohemi përmes e- mailit për t’u shprehur për propozimet tona për sa më poshtë”, thotë në e- mailin që Kryetari i Akademisë u kishte nisur anëtarëve të saj lidhur me mungesën e kohës për propozimet.