Rama: Mandatin tjetër do të ndërtojmë dy aeroporte
Kryeministri vizitë në Singapor, vlerëson njohjen e Kosovës
Kryeministri Edi Rama ka premtuar se në mandatin e ardhshëm qeverisës do të nisë punimet për ndërtimin e dy aeroporteve të reja.
Premtimin për këto investime, kreu i qeverisë shqiptare e dha gjatë takimit me homologun e tij në Singapor, Lee Hsien Loong. Kryeministri Rama ndodhet në një vizitë zyrtare në Singapor, pak javë pasi ky vend njohu pavarësinë e Kosovës. Singapori është një nga 20 vendet më të zhvilluara të botës që ka njohur pak javë më parë Republikën e Kosovës. Gjatë vizitës së tij zyrtare, kreu i qeverisë shqiptare i ka shprehur Kryeministrit të Singaporit, Lee Hsien Loong, mirënjohjen për këtë akt të qeverisë së Singaporit. “Singapori njohu pak javë më parë Kosovën, një hap shumë i rëndësishëm për Kosovën, por edhe një hap që na afron më shumë”, tha Rama. Gjatë një takimi zyrtar me homologun e tij në Singapor, Kryeministri Rama theksoi se qeveria e tij ka bërë një punë të madhe për të krijuar kushtet për të tërhequr një numër të madh turistësh. “Për sa i përket infrastrukturës aeroportuale me fokus në radhë të parë turizmin, ne kemi bërë një punë të madhe këto vite për të krijuar kushtet që tanimë kanë tërhequr interesim nga shumë anë, nuk është vetëm këtu, por edhe nga vende të tjera. Besoj që në mandatin e ardhshëm do të kemi pa diskutim fillimin e punës për të paktën dy aeroporte të reja”, deklaroi Rama. Gjatë takimit mes dy kryeministrave janë diskutuar edhe mundësitë që Shqipëria ofron për investime dhe mbi potencialet që Shqipëria ofron për investitorët në fusha të ndryshme. “Sh- qipëria ka disa potenciale të rëndësishme, por fokusi gjithmonë është energjia, nafta, mineralet dhe turizmi. Ka interesim edhe për manifakturën apo agropërpunimin, gjëra të cilat ngjallën shumë interes dhe ishin materia e një diskutimi mjaft interesant”, është shprehur Rama. Gjatë takimit më homologun e tij në Singapor, kreu i qeverisë shqiptare ka folur edhe për shkëmbime në interes të vendit, për sa i përket administrimit fiskal. “Këtu ka një dije të madhe dhe një infrastrukturë shembullore për admin- istrim fiskal, si dhe për rendin publik, ku Singapori është një nga vendet kampion për mënyrën se si e ka të organizuar të gjithë strukturën dhe për mënyrën se si ka arritur të krijojë një hapësirë sigurie të madhe, parashikueshmërie të plotë dhe kontributesh të përbashkëta, në funksion të një shteti mjaft social”, shtoi Rama gjatë takimit. Në fokus të takimit mes dy kryeministrave ka qenë edhe rritja e bashkëpunimit mes vendeve, duke shfrytëzuar potencialet dhe eksperiencat që të dy vendet ofrojnë në fusha me interes të ndërsjellë.