Grabitja e bankomatit, gjenden dy makinat

TIRANE - Policia e kryeqytetit ka arritur të gjejë dy automjetet që janë përdorur nga autorët e grabitjes së një bankomati pranë spitalit “Nënë Tereza”, ditën e shtunë. Bëhet fjalë për një fuoristradë tip “Nissan” dhe një automjet “Mercedez Benz”, të dyja të vjedhura nga autorët e ngjarjes. Katër ditë pas vjedhjes së parave të bankomatit në Rrugën e Dibrës, në Tiranë, forcat e policisë bllokuan dy automjete që përdorën autorët. Burime nga grupi hetimor thanë se grabitësit dyshohet të jenë pjesë e një grupi të specializuar në vjedhje me thyerje të bankomateve e bankave. Ata kanë thyer derën e ambientit ku ndodhej ATM dhe më pas kanë hyrë brenda, në vendin ku mbahej kasaforta me paratë. Edhe pse alarmi ka njoftuar punonjësit e kompanisë që ruan objektin, këta të fundit nuk kanë parë asnjë lëvizje të dyshimtë në vendngjarje. Të njëjtat burime thanë se të dyshuarit kanë përdorur mjete prerëse dhe oksigjen për të bërë të mundur hapjen e kasafortës. Alarmi ka rënë sërish në momentin që është hapur kasaforta, por autorët kishin arritur largoheshin në kohën kur punonjësit e sigurisë mbërritën në vendngjarje. Shërbimet e Policisë sapo u lajmëruan, u vunë në ndjekje të një fuoristrade tip “Nissan”, që rezultonte e vjedhur në muajin tetor. Ata e braktisën këtë makinë në afërsi të Vorës, ku dyshohet se i ka pritur automjeti tjetër tip “Mercedez Benz”, ngjyrë e zezë, që po ashtu rezultonte e vjedhur në një garazh pranë mbikalimit të Kamzës. Edhe këtë makinë ata e kanë braktisur në Fushë- Krujë dhe më pas janë zhdukur. Nga pamjet e kamerave të sigurisë, policia ka mundur të ndërtojë një lloj identikiti të të dyshuarve, por që ende nuk ka sjellë identifikimin e tyre. Ata dyshohet të jenë të moshave nga 20 deri në 25 vjeç.