Tri tërmete tronditin Italinë në zonën e pafat qendrore

Tri tërmete kanë tronditur Italinë Qendrore të mërkurën. Ndërtesat janë evakuuar në Romë e zonat rurale të saj të mbuluara me borë, dhe situata është përshkruar si apokaliptike. Tërmetet gjatë ditës së mërkurë goditën në të njëjtën zonë ku toka u lëkund fort gjatë vitit të kaluar. Tërmetet goditën brenda një ore. Shkollat, ndërtesat dhe metroja u evakuuan në Romë, ndërsa dëshmitarët raportuan se blloqe apartamentesh dukej sikur valëviteshin. Tronditjet vazhduan në këtë zonë, ndërsa banorët e qytetit të Aquila- s, i cili është goditur rëndë në tërmetet e mëparshme, kanë vrapuar në rrugë nga paniku. Ekspertët thanë se epiqendra e tërmetit të parë 5.3 ballësh, në orën 9: 25 të mëngjesit, ishte në një zonë të mbuluar nga dëbora e madhe, e cila është ende duke luftuar për të rimarrë veten nga fatkeqësia e një tjetër tërmeti verën e kaluar. Tërmeti i dytë me fuqi 5,7 ballë goditi 50 minuta më vonë dhe, dhjetë minuta më vonë, me të njëjtën fuqi goditi edhe tërmeti i tretë. Lëkundjet janë ndier në të gjithë rajonin e Abruzos, Lacios dhe Markes. Ka pasur dëme në ndërtesa dhe një kullë e vjetër e një prej kishave në Amatrice është shembur. Tërmeti iu bashkua kushteve të vështira meteorologjike, ku prej 36 orësh nuk pushonte dëbora në zonat afër Amatrices dhe në qytetin tjetër të goditur edhe nga tërmeti më parë, Norcia. Kreu i Bashkisë së Amatrices, Sergio Pirozzi, është ankuar për fatin e keq të qytetit të tij. “Nuk di nëse kemi bërë diçka të keqe. Për këtë e pyes veten që dje. Jemi zgjuar me dëborën me trashësi dy metra dhe tani edhe tërmeti tjetër. Çfarë mund të them? Nuk kam fjalë”, u shpreh ai. Më 24 gusht të vitit të kaluar, 300 njerëz humbën jetën dhe mijëra shtëpi e biznese u shkatërruan nga një tërmet i fuqishëm në Italinë Qendrore. Më shumë se 45,000 paslëkundje janë ndier që atëherë në rajon, përfshirë atë 6.6 ballë në tetor, dridhjet më të forta në Itali prej 36 vitesh. Fatkeqësia më e keqe e shekullit të 20 ka qenë në vitin 1908, kur 95,000 njerëz humbën jetën nga dallgët e baticës, pas një tërmeti me qendër në ujërat midis Italisë kontinentale dhe Sicilisë.