Vetingu, Gjosha: BE do të japë 10 milionë euro
“Çelja e negociatave me Bashkimin Europian do të varet nga rezultatet e prekshme të Reformës në Drejtësi, veçanërisht nga zbatimi i ligjit të vetingut”, deklaroi dje ministrja e Integrimit, Klajda Gjosha. Duke folur në takimin e Komitetit të Monitorimit të Fondeve të Instrumentit për Asistencën e Para- anëtarësimit ( IPA), ministrja tha se vëmendja që i është kushtuar mbështetjes për implementimin e Reformës në Drejtësi është tejet e çmuar. BE, theksoi ajo, do të japë për Shqipërinë 19.1 milionë euro, nga të cilat 10 milionë euro do të shkojnë për zbatimin e vetingut. “Mbështetja për rivlerësimin sa më transparent të gjyqtarëve dhe prokurorëve, e cila synon të reduktojë ndikimin e krimit të organizuar, të politikës dhe korrupsionit në drejtësi, duke rritur cilësinë profesionale në sistem, do ta bëjë më të lehtë hapin tonë të radhës për t’u afruar me BE- në, që është hapja e negociatave”, theksoi Gjosha. Ministrja e Integrimit informoi se Programi Vjetor IPA 2017 po hyn në një fazë shumë të rëndësishme me konsultimet intensive midis institucioneve shqiptare dhe KE- së për të konsoliduar dokumentet e planifikimit, dhe për të rënë dakord për modalitetet e tjera të mbështetjes. Ndërsa Programi IPA 2016 është miratuar nga Komiteti i Monitorimit të IPA- s dhe pritet nënshkrimi i tij. Gjatë fjalës së saj, ministrja Gjosha theksoi se përpjekjet e përbashkëta për të siguruar zbatimin e efektshëm dhe në kohë të projekteve të IPA- s kanë bërë të mundur që prej dhjetorit të vitit 2016 të kemi 0 projekte problematike nga 7 të tilla që kishim në prill të vitit 2015.