Zgjedhjet, Blushi: Numërim elektronik me 100 robotë
“Realizohet për 75 ditë, Qeveria ta japë me koncesion”
Kryetari i LIBRA- s, Ben Blushi, kërkoi dje numërim elektronik për zgjedhjet e 18 qershorit, duke iu bashkuar edhe partive të tjera parlamentare që kërkojnë përdorimin e teknologjisë në zgjedhje.
Gjatë një bashkëbisedimi me gazetarët, Blushi tha se përdorimi i skanerëve apo robotëve numërues kushton më pak se paratë që përfitojnë komisionerët partiakë. “Ka kohë që të zgjidhet çështja e administrimit të zgjedhjeve, ose votimi, ose numërimi elektronik. Nëse kjo qeveri ka koncesionuar kaq shumë, le të koncesionojë edhe votimin dhe numërimin elektronik. Ky votim, sipas ekspertëve që kam konsultuar ka kompani të mëdha ndërkombëtare që mund ta aplikojnë për 75 ditë. Për 75 ditë mund të aplikohet një sistem numërimi elektronik në të gjithë Shqipërinë. Ndoshta numërimi elektronik mund të ketë të njëjtën kosto me atë që harxhohet për numëruesit nga të gjitha qendrat e numërimit, të cilët paguhen tri herë, një herë nga buxheti i shtetit, paguhen nga partitë e më pas paguhen edhe nga kandidatët. Pjesa më e madhe e parave që marrin komisionerët është para e zezë që del nga financat e errëta të partive dhe kandidatëve. 100 robotë numërues nuk janë kosto e madhe për qeverinë për t’i blerë që të garantojë numërim të ndershëm të votës. Robotin nuk e zë gjumi, nuk kërkon pica, nuk merr urdhra për të braktisur numërimin siç bëjnë komisionerët”, tha Blushi.
Kreu i LIBRA- s nuk beson se do të realizohet Reforma Zgjedhore e nisur prej kohësh në Komisionin e Posaçëm Parlamentar, sepse partitë e vjetra, sipas tij, nuk e duan. “Reforma Zgjedhore është në kufijtë e fundit kohor dhe është e dukshme nevoja e partive të vjetra për ta sabotuar atë. Nëse nuk zgjidhet çështja e financimit të zgjedhjeve dhe ajo e administrimit të votës, qoftë si votim, qoftë si numërim, të paktën njëra prej tyre, këto zgjedhje do të jenë shumë të dyshimta dhe për këtë arsye mund të kemi një krizë të madhe pas zgjedhjeve. Kjo tregon se sa seriozisht partitë e vjetra e kanë marrë Reformën Zgjedhore, çka përbën burimin kryesor të të gjitha krizave në Shqipëri”, u shpreh Blushi. Për sa u përket koalicioneve të LIBRA- s, Blushi tha se pas zgjedhjeve për kryetar në shkurt, do të vendoset edhe për aleancat e mundshme. “Në fund të shkurtit do t’i japim legjitimitet organizatës sonë dhe do të kemi zgjedhje të brendshme. Çështja e koalicioneve dhe kandidatëve të LIBRA- s është çështje që i takon muajit mars”, tha Blushi. Ndër propozimet e LIBRA- s janë edhe përmirësimi i ligjit të financimeve të fushatave dhe ulja e numrit të deputetëve në 100. “Do të ishte një derë më e vogël, nga e cila nuk mund të hyjnë njerëz që kanë vrarë dhe përdhunuar, me precedentë penalë, njerëz që përndiqen nga gjykatat e të gjithë Europës gjejnë strehë në Kuvend apo në bashkitë shqiptare”, tha kreu i LIBRA- s.