Basha me senatorin Cruz: Më ofroi këshilla për të luftuar korrupsionin

Kryetari i opozitës, Lulzim Basha, është takuar gjatë qëndrimit të tij në Shtetet e Bashkuara të Amerikës me ish- kandidatin për President, senatorin Ted Cruz. Përmes një postimi të publikuar në Facebook, Basha ka deklaruar se senatori Cruz është mishërimi i ëndrrës amerikane. Basha ka rrëfyer se biseda me senatorin amerikan i ka shërbyer për të marrë këshilla interesante për të luftuar korrupsionin dhe forcuar drejtësinë. “Kisha nderin të isha i ftuar në pritjen e organizuar nga senatori Ted Cruz me të cilin pata një nga bisedat më mbresëlënëse. Jurist i shkëlqyer, prokuror dhe avokat i suksesshëm i Shtetit të Teksasit dhe njohës i rrallë i politikave publike, ai më ofroi këshilla interesante për të luftuar korrupsionin dhe forcuar drejtësinë dhe mbështetje për projektin tim për një Shqipëri të drejte dhe të mundësive për të gjithë”, deklaroi Basha. Kreu i opozitës e cilësoi senatorin Cruz si mishërim i ëndrrës amerikane. “Ted Cruz është vetë mishërimi i ëndrrës amerikane: me baba kubanezo- spanjoll dhe nënë irlandeze, i lindur në Teksas dhe i rritur në Kanada, sot është figura kyçe e Senatit dhe një ndër politikanët më të rëndësishëm të Amerikës. Kjo karrierë është e mundur vetëm në një vend të lirë dhe të hapur për të gjithë”, u shpreh Basha.