Drejtori: Qëndrimi i mësueses s'përfaqëson linjën e Medresesë

Drejtori i Medresesë së Shkodrës, Kujtim Dërvishi, ka reaguar pas videos ku shfaqet mësuesja Emine Alushi, e cila në vitin 2015 ka qenë pjesë e kësaj shkolle. Sipas tij, deklarata e mësueses Alushi pro ISIS- it nuk përfaqëson linjën zyrtare të Medresesë së Shkodrës dhe është krejtësisht e kundërt me atë çfarë ofron kjo shkollë. "Në lidhje me video- regjistrimin e dhënë në emisionin investigativ ' Stop', mendimi i dhënë dhe ajo çfarë ka thënë mësuesja, subjekt i kësaj videoje, nuk përfaqëson linjën zyrtare të Medresesë si institucion arsimor i KMSH dhe është krejtësisht e kundërt me atë çfarë ofron dhe synon shkolla jonë në procesin edukativ", u shpreh Dërvishi. Drejtori shton se Medreseja distancohet tërësisht nga ajo çfarë ka deklaruar mësuesja Emine Alushi. "Medreseja është institucion i shërbimit arsimor parauniversitar dhe vepron në bazë të legjislacionit shqiptar dhe filozofisë së KMSH. Me këtë video, regjistrim dhe përmbajtjen e tij jemi njohur mbrëmjen e së mërkurës, datë 18 janar 2017. Ne, si stafi drejtues dhe ai pedagogjik, jemi distancuar menjëherë, qartë dhe unanimisht nga opinioni dhe mendimet e mësueses në fjalë, mendime këto të transmetuara në video- regjistrim. Theksojmë se kjo mësuese në periudhën që ka punuar në Medrese ka qenë me kohë të pjesshme dhe se këtë vit shkollor nuk është pjesë e stafit pedagogjik të shkollës", theksoi më tej drejtori i Medresesë.