Analiza e 2016, në Tiranë rritet numri i vrasjeve
I pazbardhur vetëm atentati ndaj ish- policit Ajet Zeqaj
Policia tha dje se gjatë vitit 2016 kanë ndodhur më pak krime se vitin paraardhës, megjithëse janë regjistruar 6 vrasje më shumë se viti paraardhës.
Nga këto krime kundër personit, 12 prej tyre kanë ndodhur në Tiranë dhe katër në Kavajë. Përveç ekzekutimit me silenciator të ish- policit Ajet Zeqaj, në zonën e ishBllokut, të gjitha të tjerat janë të zbuluara. Drejtori i Policisë së Tiranës, Ervin Hodaj, i cili prezantoi dje analizën e punës 1- vjeçare, tha se pavarësisht se është bërë një punë e madhe parandaluese sa u përket krimeve në familje, sërish numri më i madh i vrasjeve kanë ndodhur pikërisht për çështje familjare. Nga 18 vrasje që kanë ndodhur gjatë vitit të kaluar, 7 prej tyre kanë si motiv xhelozinë ose konfliktet familjare. Në 4 ngjarje kanë ndodhur për hakmarrje, 2 për motive pronësie dhe 5 për shkaqe banale, që kanë ardhur si rrjedhojë e konflikteve të çastit. “Nga 18 vrasjet, 4 vrasje, ajo e Elton Çiçës, Skënder Alukut, Vasil Bibës dhe Ajet Zeqajt, tri të parat të zbuluara, janë me motive hakmarrjeje”, u shpreh Hodaj dje gjatë analizës. Nga ana tjetër, theksoi se në total, në territorin që mbulon Drejtoria e Policisë së Tiranës, kanë ndodhur më pak krime sesa në vitin 2015.
ANALIZA Në analizën vjetore të Policisë së Tiranës, drejtori Ervin Hodaj bëri një pasqyrim të rezultateve të një viti pune, problematikave dhe arritjeve, shifrave dhe objektivave për këtë vit. Ai u shpreh se janë shmangur ngjarjet e rënda brenda familjes, por thekson se duhen vendosur objektiva konkrete për të luftuar këtë plagë të shoqërisë. “Statistikat flasin se janë evidentuar 640 vepra penale, me 293 të arrestuar, ose 191 më shumë se viti i kaluar. Në shumë raste janë shmangur ngjarje të rënda brenda familjes. Duhet të vendosim objektiva konkretë për të luftuar këtë plagë të shoqërisë, duke përfshirë disa struktura bazike të Policisë, si struktura e policimit në komunitet, seksionet e dhunës në familje apo psikologu. Polici në komunitet, apo siç quhet ndryshe SPZja, ka qenë hallka kryesore në evidentimin dhe trajtimin e rasteve, por megjithatë duke parë shifrat, puna është akoma e pamjaftueshme, dhe kërkon një ridimensionim të këtij shërbimi”, tha Hodaj. Duke iu referuar statistikave për luftën kundër drogës, rezulton që gjatë vitit 2016 janë sekuestruar rreth 6 kg heroinë, dy herë më shumë se në 2015- n, rreth 3 kg kokainë dhe rreth 558 kg kanabis, afërsisht 375 kg më shumë se në 2015- n. Duke u ndalur edhe te reformimi që është bërë në Policinë e Tiranës, sa i përket sjelljes së Policisë me qytetarët, Hodaj tha se ka pasur punonjës policie që nuk u janë përshtatur ndryshimeve dhe kodit etik. Për këtë arsye, ata që kanë refuzuar t’i përshtaten kësaj reforme, saktësisht 175 punonjës policie, janë ndëshkuar. Nga ana tjetër, Hodaj është ndalur edhe te puna që është bërë në lidhje me hetimin e aseteve kriminale dhe pastrimit të produkteve të veprës penale. “Janë sekuestruar pasuri më shumë se një vit më parë dhe konkretisht 9 milionë e 300 mijë euro, në krahasim me 3 milionë euro të sekuestruara më pak gjatë vitit të shkuar”, u shpreh Hodaj. Ndërsa për sa u përket objektivave, duket se dy prioritetet kryesore që do të ketë për këtë vit Policia e Tiranës, janë parandalimi i dhunës e krimeve në familje, si dhe evidentimi dhe arrestimi i personave që mbajnë armë pa leje.