Nga Kruja në Tiranë, me 103 kg hashash
Policia ndjek me vrap trafikantët tek Ura e Tapizës
TIRANE - Policia ndjek me vrap trafikantët e drogës në periferi të Tiranës. Ngjarja ka ndodhur dje gjatë një aksioni të kryer nga Oficerët e Antidrogës që finalizuan hetimin e nisur prej kohësh me ndërhyrjen në afërsi të Urës së Tapizës, mes Tiranës dhe Krujës. Forcat e Policisë kanë vënë në pranga dy persona, të cilët u kapën me rreth 103 kg hashash. Burimet zyrtare thanë se forcat e Policisë ndërhynë në momentin kur po bëhej dorëzimi i 6 thasëve të mbushur me bimë narkotike, që ishin ndarë në tri makina. Në momentin që janë konstatuar automjetet, për të cilat Policia kishte siguruar më parë informacionet, shërbimet kanë nisur operacionin, duke u bërë thirrje të dyshuarve, "Ndal Policia". Por në momentin që ata kanë parë shërbimet e Policisë, kanë zbritur nga makinat dhe kanë nisur të vrapojnë në të dy krahët e Urës së Tapizës. Policia është vënë në ndjekje të tyre për disa metra, duke arritur të ndalojë dy prej trafikantëve, ndërsa i treti ka arritur t'u shpëtojë prangave e është shpallur në kërkim. Bu- rimet thanë se të tre personat e përfshirë në këtë aktivitet janë nga Nikla e Krujës dhe dyshohet se e kanë kultivuar vetë bimën narkotike që u sekuestrua. Policia tha se të arrestuarit janë Xhevdet Caca, 42 vjeç, bashkë me të miturin B. C., 16 vjeç. Ndërsa është shpallur në kërkim edhe 23- vjeçari me iniciale A. S., i cili i shpëtoi ndjekjes policore në kohën kur po zhvillohej operacioni.
OPERACIONI
Policia e Tiranës tha dje se është finalizuar me dy të arrestuar e 103 kg hashash të sekuestruar operacioni i koduar "Ura". Dy persona, Xhevdet Caca, 42 vjeç dhe 16- vjeçari B. C. janë vënë në pranga, ndërsa bashkëpunëtori i tyre ka arritur të largohet. Policia tha dje se këta shtetas, në bashkëpunim me njëritjetrin ushtronin aktivitetin kriminal të shitjes së lëndëve narkotike, të llojit kanabis sativa, kryesisht në zonën e Kamzës, në Tiranë. "Rreth orës 16: 00, në afërsi të Urës së Tapizës, është konstatuar automjeti tip ' Mercedes- Benz' në të cilin ndodhej shtetasi B. C., si dhe automjeti ' Fiat Scudo', në të cilin ndodheshin shtetasit Xhevdet Caca dhe A. S. Nga kontrolli i ushtruar janë gjetur dhe sekuestruar 6 thasë me ngjyrë të zezë, me lëndë bimore të dyshuar të llojit kanabis sativa, ku gjatë ndërhyrjes policore shtetasi A. S. ka mundur të largohet dhe po punohet për kapjen e tij", tha dhe zyrtarisht Policia e Tiranës. Të njëjtat burime thanë se, në kuadër të këtij operacioni, janë sekuestruar në cilësinë e provës materiale 102 kg e 540 gramë bimë narkotike, 5 aparate celularë të markave të ndryshme, si dhe 3 automjete. Policia tha se po punohet për kapjen e personit që u shpall në kërkim.