DURRES/ Dy të arrestuar për mitdhënie
DURRES- Tentojnë të korruptojnë policët, pranga dy personave në Durrës. Policia bëri të ditur se ka goditur dy raste mitdhënieje, duke arrestuar në flagrancë një person që drejtonte automjetin pa targa dhe i ofron ryshfet policit 5 000 lekë të vjetër, për t’iu shmangur masës administrative dhe një tjetër që kishte kaluar ditët e qëndrimit në Europë dhe për të kaluar kufirin në mënyrë të kundërligjshme i ofron punonjësit të kufirit 20 euro. Sipas Policisë, të arrestuarit janë Stavro Potka, 51 vjeç, banues në Korçë dhe Ferdinant Metushi, 53 vjeç, banues në Elbasan. Policia sqaron se “arrestimi në flagrancë i 51-vjeçarit nga Korça u bë pasi më datë 18.01.2017, në Maminas, është ndaluar nga policia teksa drejtonte automjetin pa targa. Me qëllim për t’iu shmangur masës administrative konform shkeljes së kryer, Potka ka tentuar t’i ofrojë shumën prej 5 000 lekësh punonjësit të policisë, me qëllim që të mos gjobitej. Ndërsa 53-vjeçari nga Elbasani u ndalua pasi më datë 18.01.2017 është paraqitur në pikën e kalimit kufitar Durrës për të udhëtuar në Itali me tragetin e linjës Bari- Durrës dhe në momentin e dhënies së pasaportës punonjësit të policisë, F. Metushi, ka futur në brendësi të pasaportës 20 euro”. Po për mitdhënie, policia ka kryer arrestime në Gjirokastër e Gramsh.