Vuçiç: Prishtina kishte plane ushtarake, ne duam paqe

“Krahasimi i Thaçit me Krimenë, budallallëku më i madh që kam dëgjuar”

Kryeministri serb, Aleksandër Vuçiç, në takimet e tij me ndërkombëtarët thotë se Serbia është e përkushtuar për të arritur çdo zgjidhje nëpërmjet paqes.

Sinjalet që vijnë nga ky vend janë krejt të ndryshme, me presidentin Tomisllav Nikoliç që deklaroi se shqiptarët kërkuan luftë dhe nëse është e nevojshme, edhe ai vetë do të shkojë me trupat në Kosovë. Edhe vetë Vuçiç është shprehur se ka dhënë paralajmërimin e fundit për shqiptarët, kur policia e Kosovës u aktivizua për të ndaluar një tren provokues me simbole nacionaliste dhe shkrimet “Kosova është Serbi”, duke mos e lejuar që të shkelë në territorin e Kosovës. Por ndërsa brenda vendit të tij ai flet me tone më nacionaliste, në takimet me ndërkombëtarët Vuçiç është paqja vetë. Në Davos të Zvicrës, ai ka komunikuar me Kancelaren gjermane, Angela Merkel, e cila ka shprehur shqetësimin mbi tensionet e ngritura mes Serbisë e Kosovës. Vuçiç tha se janë pajtuar që javën e ardhshme të mbajnë takim me palën kosovare, me ndërmjetësimin e Brukselit. “Për ne, ky nuk është problem. Jemi pajtuar që të përpiqemi të ndalojmë çdo lloj tensioni, edhe pse mund të jetë e vështirë”, u tha Vuçiç gazetarëve në Davos. Ndërkohë zyra e kryediplomates së Bashkimit Europian, Federica Mogherini, ka njoftuar se takimi i radhës mes Prishtinës dhe Beogradit pritet të jetë më 24 janar. Dërgimin e njësive të armatosura të Kosovës në veri të vendit për shkak të trenit Beograd- Mitrovicë, Vuçiç e quajti veprim të papërgjegjshëm dhe ka shtuar se Beogradit e Prishtinës u duhet dialogu për ardhmërinë nën mbikëqyrjen e BE- së dhe jo konflikti në zemër të Europës. Për gazetën italiane “la Republika”, ai tha se: “Ne duam dialog dhe bashkëpunim. Nuk kam qenë në rrjedhë të planit për udhëtimin e atij treni, por nëse ndaj një treni reagohet duke dërguar njësi të armatosura me mitraloza, provokohet nxitja e zjarrit, i cili përbën rrez- ik për gjithë Europën”, është shprehur Vuçiç. Sa për deklaratën e Presidentit të Kosovës, Hashim Thaçi, se Beogradi dëshiron të “aneksojë një pjesë të Kosovës, sikurse Rusia ka bërë me Krimenë”, Vuçiç tha se ky është budallallëku më i madh që kishte dëgjuar ndonjëherë dhe shtoi se Kosova, sipas Kushtetutës, është pjesë e Serbisë. “Ne nuk jemi një Rusi e vogël, as nuk kemi plane ushtarake, këto plane i kishte Prishtina”, tha ai. I pyetur se sa reale është deklarata e Presidentit serb, Tomisllav Nikoliç, se në rast të dhunës ndaj serbëve në Kosovë, Beogradi do të reagojë duke dërguar ushtrinë, Vuçiç tha se Serbia do të bëjë gjithçka për të shmangur atë dhe për të investuar në paqe.