Deputetja, protestë ndaj Erdoganit, vetëprangoset
Një deputete ka prangosur veten të enjten në Parlament duke u lidhur me mikrofonin e podiumit në shenjë proteste ndaj ndryshimeve kushtetuese që i japin shumë pushtet Presidentit Recep Tayyip Erdogan. Deputetja e pavarur, përfaqësuese e elektoratit të Ankarasë, Aylin Nazliaka, ka protestuar kundër kthimit të Turqisë në një Republikë Presidenciale. Protesta e saj u bë ndërkohë që Parlamenti turk po kryente votimin përfundimtar të paketës me 18 amendamente kushtetuese, pas të cilit Turqia pritet të mbajë një referendum. Deputetja Nazliaka u ngrit në podium dhe lidhi me pranga dorën e saj të majtë me mikrofonat. “Nuk ju dhashë fjalën, po shkelni rregulloren”, iu drejtua deputetes zv/ kryetarja e Parlamentit turk, Aysenur Bahcekapali. Ajo kërkoi nga personeli teknik që të lironte podiumin dhe dha një pushim 5- minutësh, sipas agjencisë “Hyrriet”. Por deputetja nuk po largohej nga podiumi për më shumë se 30 minuta. Kështu, një deputet i partisë në pushtet, AKP, i tha se nëse dëshironte të fliste mund t’i jepnin fjalën. Por deputetja kundërshtoi. “Kërkoj fjalën prej një viti e gjysmë dhe nuk ma keni dhënë. Tani nuk po protestoj për të marrë fjalën, por kundër kësaj pakete kushtetuese antidemokratike. Nuk e pranoj propozimin tuaj”. Edhe ditë më parë, Parlamenti turk është kthyer në arenë përleshjesh mes deputetëve kur po debatoheshin ndryshimet kushtetuese që i japin pushtet pothuajse absolut Presidentit Erdogan. Deputetë të AKP në pushtet që prej vitit 2002, dhe deputetët e CHP- së opozitare, kanë goditur me grushte njëri- tjetrin, me karrige e ç’të gjenin rrotull.