“Futbolli po përfaqësohet në Europë nga shqiptarët”
"Ja si do të përzgjidhet stadiumi për ndeshjen me Shqipërinë"
Maqedonia është në krizë të thellë. Tensionet ndëretnike dalin shpesh në sipërfaqe. 30- përqindëshi shqiptar i popullatës nuk po lëshon pe nga kërkesa për barazi me maqedonasit.
Mirëpo, në aspektin sportiv dhe kryesisht futbollistik, shqiptarët në Maqedoni kanë tjetër qëndrim dhe pozicionim. Në një intervistë për "Zërin", nënkryetari shqiptar i Federatës së Futbollit të Maqedonisë, Muhamet Sejdini, është shprehur se shqiptarët kanë pozicion të kënaqshëm në futbollin maqedonas. "Në Federatën e Maqedonisë shqiptarët janë mirë të përfaqësuar, si në Këshillin Drejtues, ku 4 janë shqiptarë prej 15 anëtarëve. Gjithashtu, zëvendëskryetari është shqiptar, i cili ka shqiptarë të punësuar në sekretariat. Në çdo ekip të Kombëtares deri në përfaqësuesen A të Maqedonisë ka nga një shqiptar, ose trajner, ose zëvendëstrajner e mbi të gjitha ka futbollistë", ka deklaruar Sejdini.
SHKËNDIJA
Muhamet Sejdini kujton se futbolli maqedonas po arrin të përfaqësohet në Europë përmes klubeve shqiptare. "Ka mjaft ngritje, sidomos me Shkëndijën, e cila arriti në ' play off' të kualifikimeve për Europa League, apo ngritjen e madhe të këtij klubi në këto vite të fundit. Shkëndija po merr përmasa të një klubi të madh, të një niveli europian. Tetova e Shkupi dhe trevat e tjera kanë shumë talente. Unë nuk mund të them se a është sot më e madhe Shkëndija, Prishtina, Partizani, Tirana apo Skënderbeu, por e di se Shkëndija është lart", nënvizoi Sejdini.
MAQEDONI- SHQIPËRI
Futbolli në Maqedoni shpeshherë ka nxjerrë në sipërfaqe edhe tensionet ndëretnike, kur tifozët maqe- donas i kanë fyer në baza etnike shqiptarët. Flitet se Federata maqedonase po planifikon që ndeshjen MaqedoniShqipëri të mos e organizojë në Shkup, por diku shumë më larg, për ta shmangur sa më shumë që është e mundur udhëtimin e tifozëve shqiptarë. Çështje për të cilën nënkryetari shqiptar i FFM-së, Muhamet Sejdini, nuk është përgjigjur, por ka shpjeguar si do të bëhet përzgjedhja e stadiumit. "Çfarë do të ndodhë, mbetet për t'u parë në të ardhmen, por them se ndeshja do të zhvillohet aty ku ka kushte, kështu që mos u bëni merak sepse loja do të zhvillohet si çdo ndeshje tjetër dhe do të fitojë ekipi më i mirë. Unë do të doja që ndeshja Maqedoni- Shqipëri të zhvillohet në Shkup, por në këshillin drejtues jemi 15 anëtarë, dhe prej tyre vetëm 4 jemi shqiptarë", shpjegon nënkryetari i Federatës maqedonase. Shqipëria po merr futbollistë nga të gjitha anët, duke u mjaftuar që të jenë shqiptarë. Muhamet Sejdini flet edhe për zgjedhjen e këtyre lojtarëve. "Ne nuk kemi pasur ndikime te përzgjedhja e futbollistëve se për kë duan të luajnë ata. Kjo zgjedhje u takon futbollistëve që ta bëjnë me vullnet të lirë", ka deklaruar Sejdini.