Kritika, Hodaj: Goditja e rasteve të korrupsionit, në nivele të ulëta

“Duhet më shumë punë për zbulimin e korrupsionit”

TIRANE - Sipas drejtorit të Policisë së Tiranës, Ervin Hodaj, edhe pse një nga prioritetet për vitin që shkoi ka qenë lufta kundër krimit ekonomik dhe korrupsionit, sërish rezultatet janë në nivele të ulëta. Në vitin 2016, rezulton të ketë një ulje të veprave penale në këtë drejtim, konkretisht 33 më pak se në vitin 2015. “Janë në total 203 vepra penale në këtë fushë, me gjithsej 303 autorë, nga të cilët 70 janë arrestuar. Vlen për t’u përmendur disa raste goditjesh korrupsioni, përfshirë prokurorë dhe gjyqtarë, apo dhe disa zyrtarë të nivelit të mesëm e të ulët. Gjithsesi është e pamjaftueshme kjo panoramë dhe ky rezultat, sidomos në goditjen e korrupsionit në nivele të larta”, tha Hodaj. Ndonëse e cilësoi si një vit të suksesshëm, sa i përket bashkëpunimit me Prokurorinë, Hodaj tha se sërish ka vend për të përmendur disa problematika të konstatuara në dinamikën e punës me Policinë, kryesisht në hetimet proaktive dhe në marrëdhëniet me Task Forcën. Sipas tij, 3 nga këto probleme janë: Reduktimi i kohës së regjistrimit të procedimeve penale të referuara nga ana e seksionit për korrupsionin; Mënyra e trajtimit të korrespondencës, pasi shpeshherë ajo anashkalohet duke mos u ndjekur protokolli dhe arshiva ndërinstitucionale, prokurorë të veçantë u delegojnë detyra oficerëve dhe ua japin ato dorazi, pa vënë në dijeni strukturën hi- erarkike, e cila ndikon në efikasitetin e procedimeve penale, dhe në matjen e kohës së punës të oficerit të Policisë Gjyqësore; Për rastet e procedimeve me metoda speciale të hetimit, duhet një marrëdhënie e reflektuar në kohë, pasi sjell pasoja në gjetjen dhe fiksimin e provave. Ka disa procedime penale, të cilat delegohen me shumë vonesë, si pasojë provat mund të humbasin aktualitetin e tyre.