“Administrata e Trump do t’i kushtojë vëmendje Shqipërisë”
Presidenti i Senatit të SHBA: Do rrisim bashkëpunimin
Kryetari i Kuvendit, Ilir Meta, gjatë vizitës së tij në Shtetet e Bashkuara, ka marrë premtimin se administrata e re e Presidentit Donald Trump do t’i kushtojë një vëmendje të veçantë Shqipërisë.
Pjesëmarrës në ceremoninë inauguruese të Presidentit Donald Trump, kryeparlamentari Meta ka zhvilluar edhe një takim me Presidentin e Senatit Amerikan, Orrin Hatch. Gjatë takimit, senatori Orrin Hatch ka shprehur kënaqësinë për pjesëmarrjen e kreut të Kuvendit Meta në ceremoninë inauguruese të Presidentit të 45- të të SHBA- ve dhe ka premtuar një vëmendje të veçantë nga administrata e re për Shqipërinë. “Kemi kënaqësinë që merrni pjesë në inaugurimin e Presidentit Trump. Administrata e re do t’i kushtojë vëmendje Shqipërisë dhe aleatëve të saj. Në këtë kuadër duhet të rrisim bashkëpunimin në disa fusha, si siguria e tregtia dhe Senati i Shteteve të Bashkuara e mbështet partneritetin në rritje mes dy vendeve”, theksoi gjatë takimit, Presidenti i Senatit Amerikan, Orrin Hatch. Vetë kryeparlamentari Meta e cilësoi gjatë takimit inaugurimin e Presidentit Trump një ngjarje me rëndësi jo vetëm për SHBA- të, por për të gjithë globin. Sipas Metës, angazhimi i SHBA- ve në rajonin e Ballkanit është shumë i rëndësishëm për paqen dhe sigurinë në rajon. “Inaugurimi i Presidentit Trump është me rëndësi jo vetëm për SHBA- të, por edhe në aspektin global. Besoj në një bashkëpunim në rritje për të ardhmen ndërmjet Shteteve të Bashkuara të Amerikës dhe Shqipërisë. Angazhimi i SHBA- ve në Ballkan është shumë i rëndësishëm për paqen dhe sigurinë e rajonit”, ka theksuar kreu i Kuvendit, Meta. Gjatë qëndrimit të tij në Shtetet e Bashkuara, kryeparlamentari Meta është takuar edhe me Kryetarin e Komisionit për Politikën e Jashtme në Kongresin Amerikan, Ed Royce. Gjatë këtij takimi, kryeparlamentari Meta theksoi rëndësinë e një partneriteti ndërmjet Shqipërisë dhe Shteteve të Bashkuara të Amerikës. “Shqipëria është e vendosur për të forcuar edhe më tej partneritetin e saj me SHBA- të. Shqipëria është dhe do të jetë aleate e vendosur e Shteteve të Bashkuara të Amerikës. Mbështetja amerikane në Ballkan është jetike për stabilitet dhe siguri”, deklaroi Meta.