Bylykbashi: Ramës i prishen skemat nga votimi elektronik
“Zhduket shitblerja e votës, mbushja e kutive dhe korrupsioni”
Bashkëkryetari i Komisionit për Reformën Zgjedhore, Oerd Bylykbashi, ka shpjeguar arsyet përse Kryeministri Rama nuk e do votimin elektronik.
Në një reagim pas refuzimit që kreu i qeverisë i bëri propozimit të demokratëve për votim elektronik, Bylykbashi ka renditur 10 arsye përse ky votim refuzohet nga kreu i qeverisë. Sipas Bylykbashit, përmes këtij votimi do të zhduken fenomenet e shitblerjes së votës, mbledhjes së kartave dhe mbushja e kutive. “Votimi elektronik zhduk shitblerjen e kartave të identitetit. Zgjedhësi do të identifikohet me shenjën e gishtit. Zhduk votimin e shumëfishtë nga një person në qendra të ndryshme. Zhduk mbushjen e kutive nga komisionerët militantë. Identifikimi me shenjën e gishtit e bën të pamundur që ushtria e “ustallarëve” të Ramës të hedhë vota në kuti për zgjedhësit që nuk kanë votuar”, sqaron Bylykbashi.
VOTIMI
Deputeti demokrat sqaron se përmes votimit elektronik zhduken edhe fenomenet e votimeve familjare dhe përdorimit të kartave të falsifikuara. “Zhduk votimin në emër të personave të tretë, veçanërisht në emër të emigrantëve. Zhduk votimin familjar, kur babai merr kartat e identitetit të familjarëve dhe voton ai për të tjerët. Pra, i hiqet Ramës mundësia që duke blerë kryefamiljarin, të blejë me shumicë edhe votat e grave të familjes. Zhduk përdorimin e kartave të falsifikuara. Redukton shitblerjen e votës, sepse eliminon zinxhirin e votimit “karuzel”, kur një fletë votimi e bardhë nxirret jashtë qendrës së votimit, mbushet nga “ustallarët” dhe kundrejt pagesës, i jepet votuesit ta hedhë në kuti e të nxjerrë jashtë fletën e tij të paplotësuar”, shton Bylykbashi.
KOMISIONERËT
Sipas deputetit të PD, votimi elektronik do të eliminojë edhe korrupsionin që ndodh në qendrat e votimit dhe numërimit me komisionerët. “Eliminon korrupsionin e komisionerëve të qendrave të votimit apo presionin mbi to për të mbushur kutitë, lejuar votimin e shumëfishtë, atë familjar apo me karta false. Eliminon korrupsionin e numëruesve militantë partiakë, që bëjnë pazar me votat e partive. Rezultati i votimit del automatikisht dhe brenda pak orësh në të gjithë Shqipërinë. Këto skema i prishen Ramës nga votimi elektronik, ndaj ai spërdridhet e kacavirret mbi xham për ta refuzuar atë. Nëse këto fenomene nuk zhduken, zgjedhjet nuk janë të lira e të ndershme”, deklaron deputeti i PD-së.