Moisiu: Vetingu, të zbatohet pa ndikime politike
Xhafaj: Javën e ardhshme mbërrin në Tiranë misioni ndërkombëtar
Ish- presidenti i Republikës, Alfred Moisiu, kërkoi dje një proces vetingu të ndershëm dhe larg ndikimeve politike. Në “Forumin civil 2010”, ku merrnin pjesë politikanë, gjyqtarë dhe juristë të njohur, Moisiu tha se procesi i vetingut duhet të krijojë besim te qytetarët. “Ne kemi arritur në fazën e jetësimit të vetingut dhe më shumë se ana procedurale e kandidaturave, procesi kërkon besim dhe integritet nga personat dhe institucionet e përfshira. Ne kërkojmë një proces rivlerësimi ( veting) pa paragjykim për të gjithë dhe pavarësisht nga posti, apo raporti personal që ka pasur me procesin e Reformës në Drejtësi; një veting pa ndërhyrje politike, transparent dhe me standarde të njëjta për të gjithë, në secilin nivel të drejtësisë, pavarësisht lidhjeve familjare, politike, krahinore, mediatike apo lobeve që sponsorizojnë kandidatë të veçantë; veting që krijon besim dhe hap dritën jeshile për aplikim edhe në politikë, edhe në strukturat e tjera vendimmarrëse të shtetit, në mënyrë që Reforma në Drejtësi të mos mbetet një lulishte e bukur në një lagje të shëmtuar, por i gjithë sistemi të kryejë një katarsis moral, profesional dhe ndershmërie”, tha Moisiu. Vetingu tashmë është në fuqi dhe Fatmir Xhafaj bëri me dije se javën tjetër fillon puna për ngritjen e institucioneve të vetingut, ku do të vijnë përfaqësuesit e Operacionit Ndërkombëtar të Monitorimit, si dhe do të bëhet ngritja e Këshillit të Emërimeve në drejtësi. Xhafaj tha se ka presion në lidhje me ngritjen e institucioneve të vetingut. “Javën tjetër në Tiranë do të jenë trupa ndërkombëtare që do të merret me vetingun, gjithashtu javën tjetër fillon dhe procesi i përzgjedhjes së institucioneve të vetingut dhe ekipeve të tyre. Shohim me shqetësim disa përpjekje në sistemin e drejtësisë, në prokurori dhe gjykata për të deformuar frymën”, tha Xhafaj i pranishëm në këtë forum.