Legalizimet, Gjermeni: Për zonat informale përfundon brenda vitit
Procesi i legalizimit në zonat informale do të mbyllet brenda këtij viti. Ministrja e Zhvillimit Urban, Eglantina Gjermeni, kërkoi nga drejtoritë e ALUIZNI- t që të punojnë me të njëjtat ritme, për të bërë të mundur që familjet që jetojnë në këto zona të pajisen me certifikatën e pronësisë brenda këtij viti. “Angazhimi dhe objektivi ynë për vitin 2017 është mbyllja e procesit të legalizimit në të gjitha zonat informale, që në rang vendi janë identifikuar dhe miratuar me Vendime të Këshillit Kombëtar të Territorit 277 zona informale. Janë rreth 300 mijë familje që jetojnë në këto zona, ku numri i ndërtimeve të identifikuara është rreth 200 mijë, ndaj dhe kërkesa ime për këtë vit do të jetë përfundimi i procesit të legalizimit në këto zona”, tha Gjermeni në analizën vjetore të ALUIZNI-t. Vetëm gjatë vitit të kaluar janë legalizuar 51.351 ndërtime pa leje. Ndërkohë në total numri i le- jeve të lëshuara në periudhën 2014- 2016 është rreth 90 mijë. Ndërsa vuri në pah punën e mirë që është bërë në disa drejtori, përkatësisht në Drejtorinë e Tiranës, Durrësit, Fierit dhe Elbasanit, ministrja nuk kurseu as kritikat për ato drejtori, të cilat kanë mbetur pas në drejtim të këtij procesi, duke paralajmëruar se papërgjegjshmëria dhe arroganca nuk do të tolerohen. “Në ato drejtori ku performanca nuk ka qenë ajo e duhura, u kërkoj drejtuesve të këtyre drejtorive të mobilizojnë stafet e tyre për të rritur per- formancën dhe të tregojnë përgjegjshmëri në punën e tyre të përditshme. E kam thënë dhe do ta ripërsëris mesazhin e dhënë gjatë takimeve të mëparshme që kemi pasur, se papërgjegjshmëria në punë dhe arroganca nuk do të tolerohen”. Më tej ministrja u ndal edhe në vendimin e fundit të Qeverisë, që i hap rrugë hipotekimit të 1370 pallateve, nga ku përfitojnë 30 mijë familje. Gjermeni kërkoi që të respektohen afatet ligjore, në mënyrë që të mos ketë zvarritje të mëtejshme të procesit.