Fleckenstein: Opozita të mos bojkotojë Kuvendin
Raportuesi i Parlamentit Europian, Knut Fleckenstein, i kërkoi dje opozitës të mos bojkotojë parlamentin. Duke folur për “Top Channel”, Fleckenstein tha se PE do të gjykojë në vijimësi se si do të shkojë procesi i nisjes së vetingut. “Ne do të gjykojmë në vijimësi. E takoj në mënyrë të veçantë zotin Basha, sepse janë krijuar disa pengesa në këtë drejtim me sa duket. Ne mendojmë se zbatimi praktik i Reformës në Drejtësi është një nga gjërat më të rëndësishme, e kur shohim pengesa të tilla duhet të shohim për të gjetur zgjidhje konkrete. Kjo duhet të ndodhë deri në fund të javës së ardhshme, kohë kur do të instalohen komisionet parlamentare për vetingun dhe çdo deputet duhet të jetë aktiv në punimet e parla- mentit dhe të bëjë punën e tij.
Ky është një apel i drejtuar atij. Unë mendoj që të protestosh është normale, të ndryshosh qeverinë po ashtu. Të mos shkosh të punosh nuk është aspak normale. Unë i them opozitës të vijojë protestën nëse dëshi- ron, por jo të bojkotojë parlamentin”, u shpreh Fleckenstein. Takimin e parë në Tiranë, Fleckenstein e zhvilloi në hotel “Rogner” me ambasadorët e SHBA- ve dhe BE- së, Donald Lu dhe Romana Vlahutin. Në çadrën e pro- testës ishte përhapur lajmi se raportuesi i PE- së do të shkonte të takonte protestuesit. I pyetur nga gazetarët nëse do të shkonte në çadrën e protestës, Fleckenstein tha se “Unë nuk shkoj në asnjë protestë. Jam thjesht i ftuar këtu”. Axhenda e takimeve e raporterit Fleckenstein vijoi me një takim me Kryeministrin Rama, kreun e Kuvendit, Meta, në praninë edhe të ministrit të Drejtësisë, Vasili, dhe më pas me ministren e Integrimit Europian, Klajda Gjosha. Ditën e parë të qëndrimit të tij në Tiranë, Fleckenstein e ka mbyllur me një vizitë me kreun e opozitës Lulzim Basha në selinë e Partisë Demokratike.