Hetimi nga prokuroria, Biba: Kemi zbatuar ligjin e dekriminalizimit
Kryetari i Komisionit Qendror të Zgjedhjeve, Denar Biba, i është drejtuar me një letër Presidentit Nishani, kryetarit të Kuvendit, Meta, dhe Kryeministrit Rama, në të cilën ka sqaruar punën e këtij institucioni për zbatimin e ligjit për dekriminalizimin. Letra i është drejtuar edhe kryeprokurorit Llala, ambasadores së BE- së, Vlahutin, ambasadorit, Lu, ambasadorit të OSBE- së, Borchardt, dhe kreut të Zyrës së Këshillit të Europës, Neukirch. Në letër Denar Biba ka sqaruar punën e KQZ-së, pas akuzave të ngritura nga prokuroria se KQZ-ja ka favorizuar me anë të mosveprimit zyrtarët që fshehën dënimet. Prokuroria akuzon KQZ- në se ka favorizuar zyrtarët, duke pranuar korrigjimet te formularët e dekriminalizimit dhe jashtë afatit, ndërsa për zyrtarët e inkriminuar nuk i ka hequr mandatin. Por në letrën e tij, Denar Biba u ka vënë në dispozicion të gjithë praktikën ligjore krerëve të shtetit dhe diplomatëve të vendit. “KQZ ka treguar qartësisht vullnetin në lidhje me zbatimin e ligjit për dekriminalizimin. Në të gjitha rastet kur prokuroria apo organet e tjera i kanë vënë në dispozicion materialet e mjaftueshme me subjektet e caktuara, KQZ-ja nuk ka hezituar për asnjë çast dhe ka vendosur menjëherë ndërprerjen e mandateve të deputetëve, kryebashkiakëve, apo këshilltarëve bashkiakë”, thuhet në letrën e Bibës, i cili shton më tej se për pretendimet e prokurorisë “KQZ- ja vijon të kryejë detyrën me përgjegjshmëri dhe në përputhje me Kushtetutën”.