FALJA FISKALE

MAKINAT

140 mijë makina që nuk kanë kryer asnjë veprim pas datës 31 dhjetor 2011 e në vijim do të përfitojnë fshirjen e taksës së regjistrimit të përvitshëm të mjeteve dhe taksës vjetore të qarkullimit rrugor, taksës vjetore të mjeteve të përdorura, taksës së mjeteve luksoze, si dhe të gjobave të llogaritura për efekt të mospagimit të taksave. Për ata qytetarë që janë të interesuar ta mbajnë mjetin në qarkullim, ligji parashikon faljen e gjobës dhe kamatëvonesës së krijuar nga janari 2011 deri në dhjetor 2014, me kushtin që detyrimet të paguhen 100 për qind. Për rastet kur pronari nuk paraqitet brenda 6 muajsh në Drejtorinë e Transporteve, makina do t’i çregjistrohet dhe targa i dërgohet për bllokim Policisë së Shtetit

FALJA PA KUSHTE

Në faljen e detyrimeve tatimore pa kushte amnistia përfshin faljen e detyrimeve që biznesi ka krijuar para dhjetorit të 2010s, duke përjashtuar vetëm kontributet e sigurimeve shoqërore dhe shëndetësore. Në dogana, bizneseve u fshihen pa kusht detyrimet e papaguara para 31 dhjetorit të 2010- s.

FALJA ME KUSHTE

Në faljen e detyrimeve me kusht ligji parashikon se: për detyrimet që biznesi ka krijuar në Dogana dhe Tatime për periudhën 1 janar 2011 deri në 31 dhjetor 2014, me kusht që brenda 6 muajve nga hyrja në fuqi e këtij ligji të paguhet i plotë detyrimi, falen gjobat, kamatëvonesat dhe interesat. Në Tatime qeveria ka përfshirë faljen edhe të gjobave dhe kamatëvonesave edhe për taksat vendore të papaguara që i përkasin periudhës tatimore nga janari 2011 deri në dhjetor 2014, me kushtin që detyrimi të paguhet 6 muaj brenda hyrjes në fuqi të ligjit.