Ligji i ri, 140 mijë makinat që u fshihen taksat e papaguara
Ahmetaj tregon afatet: Fshihen detyrimet para 2011
Qeveria miratoi dje draftin e fshirjes së detyrimeve dhe faljen e gjobave. Ministri i Financave, Arben Ahmetaj, informoi se nga ligji i fshirjes së detyrimeve do të përfitojnë pronarët e makinave dhe biznesi që ka detyrime të papaguara në Dogana e Tatime.
Ministri Ahmetaj tha se pa kusht fshihen detyrimet para 2011- s, ndërsa deri në 2014- n do të falen vetëm gjobat dhe kamatëvonesat, në rast se paguhet detyrimi. Ministri i Financave tha se në total fshihen 90 miliardë lekë detyrime. “Fshihen detyrimet fiskale përfshirë principalin, kamatëvonesën dhe gjobën, për periudhat përpara dhjetorit 2010, për të gjithë individët, personat fizikë dhe juridikë, që kanë detyrime të papaguara sipas kushteve të përcaktuara në këtë ligj. Fshihen gjobat dhe kamatëvonesat për periudhën 2011 deri në 2014, me kushtin që brenda 6 muajve nga hyrja në fuqi e ligjit të paguhet e plotë taksa”, tha Ahmetaj. Ministri i Financave tha se e njëjta procedurë është edhe për pronarët e makinave. Në total, nga falja e taksave për makinat llogaritet të përfitojnë 140 mijë pronarë mjetesh. “Fshirja dhe heqja nga qarkullimi dhe çregjistrimi i mjeteve të transportit për të cilat nuk është kryer asnjë veprim deri në dhjetor 2011, si dhe shuarja e çdolloj detyrimi për këto mjete. Gjithashtu, për mjetet e transportit të cilat nuk hiqen nga qarkullimi, parashikohet shuarja e detyrimeve tatimore për periudhat para 2010- s dhe fshirja e gjobave dhe kamatëvonesave për periudhat 2011- 2014, me kusht pagesën e detyrimeve nga 2011- ta e në vijim. Pra, është parimi i pagesës së principalit për fshirjen e gjobave dhe kamatëvonesave”, tha Ahmetaj. Për pronarët e makinave, ligji parashikon dy opsione. Për ata pronarë të makinave që nuk do të paraqiten brenda 6 muajve të çregjistrojnë mjetin, çregjistrimi do të kryhet nga Drejtoria e Transportit dhe targa do t’i kalohet Poli- cisë së Shtetit për të ndaluar qarkullimin. Për ata pronarë makinash që duan të mbajnë mjetin në qarkullim, u falen taksat para 2011- s, por nga ana tjetër duhet të paguajnë taksat deri në 2014- n, me përfitim vetëm falje gjobe dhe kamatëvonesash.