Berisha: Fleckenstein u ngut, mafia e Soros rrezik për demokracinë
Ish- kryeministri Sali Berisha u ka kthyer përgjigje deklaratave të raporterit të PE- së për Shqipërinë, Knut Fleckenstein, i cili i ka quajtur si përralla deklaratat për lidhjet e ambasadorëve Lu dhe Vlahutin me Xhorxh Soros. Berisha, jo vetëm që nuk është tërhequr nga akuzat e tij, por i ka përforcuar ato, duke thënë se i ka të provuara dhe me dokumente. “Më duhet t’i them se deklaratën e tij e konsideroj të ngutur dhe të pabazuar për arsyet që vijojnë: Deklaratat e mia për Xhorxh Soros dhe mafien e tij si një rrezik madhor për demokracinë shqiptare janë të bazuara jo në hamendje, por në dokumente autentike të pakundërshtueshme nga të gjithë ata që duan të besojnë të vërtetën. Denoncimet e mia në Parlamentin shqiptar ndaj veprimeve mafioze të Sorosit dhe network-ut të tij në Shqipëri, të bazuara në dokumente dhe fakte, datojnë vite më parë dhe nuk kanë lidhje me polemikën e sotme, që zhvillohet në SHBA për veprimtarinë e kryespekulantit të planetit. Xhorxh Soros përfaqëson sot miliarderin që ka korruptuar më shumë se kushdo tjetër mbi tokë politikanë, personalitete lokale dhe ndërkombëtare në vendet ishkomuniste, por edhe në vende të tjera. Ai ka korruptuar gjithashtu individë dhe grupe ne institucione serioze ndërkombëtare të vendosura në kryeqytete të vendeve të ndryshme, përfshi këtu Berlinin!”, ka thënë dje Berisha. Ish- kreu i PD- së ka thënë më tej se kjo çështje do të ishte mirë të hetohej nga Parlamenti Europian për të nxjerrë të vërtetën. “Mendoj se jo hedhja poshtë me apriori apo paragjykime të zërave që kërkojnë të nxjerrin në shesh një të vërtetë tronditëse, por hetimi me transparencë nga Parlamenti europian dhe parlamente të vendeve të interesuara duhet të ishte përgjigjja e duhur dhe respekti i detyruar nga e vërteta. Së fundi, shtoj se me deklaratat e mia kam vetëm një qëllim: të mbrojë një të vërtetë që e vlerësoj se ka interes të padiskutueshëm për vendin tim, por edhe miqtë e mi, kudo që janë”, ka thënë Berisha.