Meta: Dialogu me opozitën, kyç për integrimin në BE
“Për mua Parlamenti pa opozitën nuk ka kuptim”
Kryetari i Kuvendit, Ilir Meta, kërkoi dje zbatim të procesit të vetingut sipas Kushtetutës dhe klimë konstruktive e garanci maksimale për zgjedhjet e 18 qershorit.
Duke folur para kryesisë së LSI- së, Meta shprehu angazhimin e LSI- së për të krijuar një klimë sa më konstruktive dhe bashkëpunuese. “Shpreh angazhimin e LSI dhe timin për të dhënë kontributin tonë maksimal për një klimë sa më konstruktive dhe bashkëpunuese. E ardhmja jonë europiane kërkon dy elementë kyç: Një fillim të zbatimit të procesit të vetingut në mënyrën më kushtetuese, ligjore dhe transparente. Dhe një klimë konstruktive e mirëbesimi dhe garancish maksimale brenda të gjitha mundësive praktike për standardin më të lartë që duhet të arrijnë zgjedhjet e 18 qershorit. Edhe ato janë kyçe për hapjen e negociatave”, tha Meta. Sipas tij, për LSI- në ka tri fjalë kyçe në këtë moment.
“Ne si LSI kemi tri fjalë kyçe deri në fund të zbatimit të Reformës në Drejtësi: Kushtetuta, ligji dhe transparenca”, u shpreh Meta. Më herët, kryetari i Kuvendit tha se vendi i opozitës është Parlamenti dhe pa të nuk mund të funksionojë Parlamenti. “Patjetër që dialogu me opozitën është kyç dhe për integrimin europian. Parlamenti, në radhë të parë, është i opozitës, sepse maxhoranca ka edhe qeverinë. Kështu që opozita Parlamentin ka. Dhe është gjithnjë e mirëpritur në mënyrë që të çojë përpara kërkesat e saj për standarde më të larta për zgjedhjet e 18 qershorit. Ju e dini që për mua Parlamenti pa opozitën nuk ka kuptim. Kështu që do të bëjmë të gjitha përpjekjet në mënyrë që kjo klimë të përmirësohet dhe të rritet besimi i shqiptarëve, në radhë të parë, te zgjedhjet, por edhe të përmirësohet klima tani ku jemi në një moment mjaft të rëndësishëm të ecjes përpara të Reformës në Drejtësi”, tha Meta. Kryetari i Kuvendit i kujtoi politikës shqiptare se vetingu dhe zgjedhjet me standarde janë kushtet për të hapur negociatat për anëtarësim me Bashkimin Europian. “Negociatat nuk hapen pa u zbatuar vetingu dhe pa u realizuar zgjedhjet e standardeve. Meqenëse përmendët negociatat, ato nuk hapen pa u zbatuar në mënyrë korrekte ligji i vetingut, që do të thotë kushtetuese dhe ligjore. Dhe, së dyti, pa u realizuar dhe zgjedhje të standardeve më të larta në 18 qershor. Hajde bashkojmë forcat për të ecur në këto dy drejtime, në mënyrë që të hapen ato që janë negociatat më të rëndësishme për Shqipërinë dhe për shqiptarët”, u shpreh Meta. Ai u angazhua si kryetar i Kuvendit për krijimin e një klime konstruktive. “Kuvendi do të zhvillojë në mënyrën më transparente të gjitha procedurat që i takojnë dhe do të përpiqemi të krijojmë klimën më të mirë konstruktive për të ecur në zbatim të Kushtetutës dhe të ligjeve që Kuvendi ka miratuar për Reformën në Drejtësi”, tha Meta para gazetarëve.