Pronat, nis aplikimi për fondin 1.5 milionë USD
Agjencia e Kthimit të Pronave hap aplikimin për ndarjen e 1.5 milionë USD. Lista e 340 familjeve që përfitojnë e dokumentet që duhen
Janë rreth 340 pronarë të shpronësuar për efekt të procesit legalizues, të cilët kanë mundësi të marrin kompensimin për tokën që u është zënë nga ndërtimet pa leje.
Agjencia e Trajtimit të Pronave njofton hapjen e aplikimeve për fondin 1.5 milionë dollarë të vënë në dispozicion nga ALUIZNI. Gazeta boton sot listën e plotë të përfituesve në 5 qytete, përkatësisht në Tiranë, Shkodër, Elbasan, Korçë dhe Kavajë. Në njoftimin e ATP- së theksohet se procesi i pranimit të kërkesave të përfituesve ka nisur prej fillimit të kësaj jave dhe nuk do të jetë i kufizuar në afat.
DOKUMENTET Për kryerjen e pagesës në masën respektive për secilin prej pronarëve të shpronësuar për efekt të procesit legalizues është e nevojshme që më parë të bëhet plotësimi i dosjes. Qytetarët duhet të paraqesin në agjenci numër llogarie, kopje të kartës së identitetit, prokurë të posaçme, mandatin e pagesës prej 2 mijë lekësh, certifikatë familjare dhe dëshminë e trashëgimisë. Vlen të theksohet se ata të cilët kanë aplikuar më parë dhe nuk kanë përfituar për shkak të mungesës së një apo më shumë dokumenti kanë të drejtë të riaplikojnë. Këto familje nuk do të kenë detyrimin për të paguar tarifën e shërbimit prej 2 mijë lekësh, nëse vërtetojnë që e kanë kryer më parë.
FONDI Ligji i ndryshuar i legalizimeve parashikon që 70% e fondit të arkëtuar të shkojë për kompensimin e pronarëve të shpronësuar. Kështu, paralelisht me procedurat e kalimit të pronësisë, pra pajisjes me tapi të qytetarëve që kanë ndërtuar pa leje, bëhet edhe kompensimi i familjeve pronare. Me ndryshimet e bëra së fundmi pronarët nuk do të përfitojnë më 4 këste kompensimi, siç ka ndodhur deri më tani, por 5, në masë totale 70 për qind të vlerës së pronës. Në këtë mënyrë, detyrimi që i mbetet agjencisë përkundrejt tyre reduktohet në masën 30 për qind.