Berisha takon Lu, sulmon Soros, sqaron kërkesën për qeveri teknike
Ish- Kryeministri Sali Berisha i ka kërkuar ambasadorit të SHBA- ve në Tiranë, Donald Lu, që qeveria amerikane të ndalojë veprimtarinë e George Soros në Shqipëri. Qëndrimin e tij ish- kryeministri Berisha ia përcolli diplomatit amerikan në një takim, që kishte në fokus zhvillimet e fundit politike dhe bojkotin e PD- së. Sipas Berishës, Soros që nga viti 1993 ka investuar me miliona dollarë në mbështetje të ish- komunistëve dhe për të dëmtuar PD- në. “Që nga viti ‘ 93 deri sot, George Soros ka shpenzuar miliona dollarë, jo vetëm në mbështetje të ish- komunistëve shqiptarë, por direkt kundër PD- së. Soros është një milioner dhe në Ballkan i blen lirë politikanët. Unë do të vlerësoja nëse qeveria amerikane do të ndalojë një veprimtari të tillë të tij”, ka deklaruar Berisha gjatë takimit me ambasadorin Lu. Gjatë takimit, Berisha ka dhënë edhe shembuj konkretë të ndërhyrjeve të Soros në Shqipëri dhe mbështetjes së dhënë ndaj Kryeministrit Rama. Për Berishën, opozita shqiptare për herë të parë në histori fillon një protestë të pandërprerë në periudhë elektorale. Ish- kryeministri theksoi se opozita beson se Shqipëria me drogën nuk zhvillohet, por shkatërrohet. Në këtë kontekst, ai u shpreh se Rama, në kuptimin e vërtetë të fjalës, është një lloj Noriege, ndaj të cilit SHBA- të dhe komuniteti ndërkombëtar duhet të mbajnë qëndrim të prerë. Një tjetër shqetësim që duhet vlerësuar nga SHBA- të, sipas Berishës, janë edhe individët e inkriminuar, të cilët po lirohen për t’i shërbyer maxhorancës në zgjedhjet e ardhshme. “Një nga arsyet pse opozita po proteston janë bandat kriminale më të rrezikshme të vendit, të cilat janë liruar dhe po lirohen nga burgu me ndërhyrjen direkte të Edi Ramës, si Lul Berisha, ‘ Hakmarrja për Drejtësi’ etj., me qëllimin kryesor grabitjen e zgjedhjeve. Klement Balili sot shëtit i lirë nëpër Sarandë, ndërsa shefi i policisë që duhet ta arrestojë është emëruar prej tij dhe informohet për çdo operacion. Nga ana tjetër, Shullazi është pothuaj më i fuqishëm në burg sesa jashtë burgut, duke u dhënë urdhra dhe ofruar favore zyrtarëve në të gjitha nivelet e administratës”, u shpreh Berisha gjatë takimit. Berisha me një status në “Facebook”, ka sqaruar se gjatë takimit me Donald Lu ka kërkuar krijimin e një qeverie teknike. “Ediskobari me mediat e tij po festojnë trillimin e tij, sipas të cilit unë në takimin tim me ambasadorin e SHBA- ve, Donald Lu, nuk paskam kërkuar qeveri teknike. Për të mos e lënë të gëzohet me mashtrimet e tij, pra me lugë bosh, po e sqaroj Ramën se jo vetëm që kam deklaruar se me Ramën nuk ka zgjedhje, gjë që lexohet në çdo rresht të njoftimit për shtyp, por kam theksuar se për një proces të lirë dhe të ndershëm zgjedhor, zgjidhja e vetme është qeveria teknike dhe përveç këtyre, siç e kam bërë publike, e kam krahasuar pa asnjë ekuivok Ramën me ish- narkodiktatorin e Panamasë, Noriega, me të cilin Rama nuk ka asnjë dallim. Ndaj, i them Ramës mos u gëzo me trillimet e tua, por bëhu gati dhe ik, dhe thellohu mirë në kuptimin e krahasimit që të kam bërë me Noriegën!”, shkruan Berisha.