Batutat te Ligjet, Rama i LSI e vlerëson Xhafajn, ministri i ri: Më le pa gojë
Mbledhja e fundit nën drejtimit e Fatmir Xhafajt, kalojnë dy ligjet për Reformën në Drejtësi, voton Doshi dhe Fufi
Komisioni i Ligjeve ka miratuar në mbledhjen e fundit të drejtuar nga Fatmir Xhafaj, dy nga 27 ligjet e rëndësishme të paketës së Reformës në Drejtësi, Kodin e ri të Procedurës Penale dhe Kodin Penal të Republikës së Shqipërisë.
Në mbledhjen e fundit, maxhoranca kishte mbledhur të gjithë deputetët e saj për t’i kaluar projektligjet pa probleme. Në mbledhje dje ra në sy prania e dy deputeteve pa grup parlamentar, si Tom Doshi dhe Mhill Fufi, të cilët dëgjuan më vëmendje nenet e reja për arrestimet, apo procedurat që do të ndjekë prokuroria për ndjekjen penale. QËNDRIMI I LSI-SË Por, gjatë mbledhjes së djeshme, Lëvizja Socialiste për Integrim ka qartësuar votën e saj për seancën e ditës së enjte, ku do të emërohet ministri i ri i Brendshëm. Kryetari i Grupit të Lëvizjes Socialiste për Integrim, Luan Rama, ka befasuar të gjithë teksa falënderuar Fatmir Xhafajn për punën e shkëlqyer që ka kryer në miratimin e Kodit të ri Penal dhe Kodit të Procedurës Penale, lavdërime që befasuan edhe vetë Fatmir Xhafajn. Ky i fundit mbeti i habitur, teksa Luan Rama ia deklaroi “votën” dhe vlerësimin para të gjithë kolegëve socialistë. “Përveç falënderimit për punën e mirë të bërë nga të gjithë ekspertët e huaj dhe vendës, dua të bëj një falënderim të veçantë për ju si kryetari i Komisionit të Ligjeve, që keni drejtuar këtë proces me kaq vështirësi dhe me kaq komplikacione, duke e kurorëzuar me sukses”, tha dje Luan Rama. Po ky moment u shfrytëzua nga deputeti i Partisë Socialiste, Dashamir Peza, për të bërë një batutë. Pasi Rama mbaroi falënderimit, Peza kërkoi që të vendosej muzikë për të celebruar këtë eveniment, por kjo ka shkaktuar të qeshura mes deputetëve, aq sa skuqi dhe vetë Fatmir Xhafaj. Ministri i dekretuar tha dje se kishte mbetur pa gojë nga vlerësimi i deputetit të Lëvizjes Socialiste për Integrim. “Më le pa gojë, më le. Sa isha duke menduar kush e di ça do thotë dhe si ta zgjidh, thashë”, u shpreh Xhafaj duke qeshur.
NDRYSHIMET
Për herë të parë përfshihet në Kodin e Procedurës Penale roli i gjyqtarit të seancës paraprake, i cili kur prokurori përfundon hetimet do të vendosë nëse ka lëndë për gjykatë apo jo. Në këtë mënyrë, gjykatësi i seancës paraprake do të kontrollojë të gjithë vendimmarrjen e prokurorit në ushtrimin e ndjekjes penale dhe hetimit në momentin e përfundimit të hetimeve. Këtë rol e luante deri më tani Prokurori i Përgjithshëm. Projektligjet për Kodin Penal i kalojnë seancës plenare, ku opozita vijon bojkotin dhe për t’u miratuar duhet shumicë e cilësuar prej 84 votash të deputetëve.