Majko: Pse s’blejmë dot vota nëse kemi qeveri teknike? E keni gabim!

Ish- kryeministri Pandeli Majko iu është përgjigjur me ironi pretendimeve të opozitës për qeveri teknike dhe blerje votash me paratë e kanabisit. Në një takim elektoral në zonën e Kombinatit, i shoqëruar nga ministri i Brendshëm në largim, Saimir Tahiri, Majko tha se nuk e pengon qeveria teknike për të blerë vota. “Na thonë nga çadra se duam qeveri teknike sepse mund të blini vota. Pse s’blejmë dot vota, nëse kemi qeveri teknike? E keni gabim...!! Çfarë janë këto argumente”, tha Majko. Deputeti i Partisë Socialiste i kërkoi bazës që të mos merren me pretendimet e opozitës. “S’kemi ndërmend ta mbyllim veten në çadër dhe në zyrë, do takojmë ata që na e kanë dhënë pushtetin dhe vetëm ata mund të na e heqin pushtetin me votë më 18 qershor. Nëse duan qeveri teknike është te komisioni i votave, atje është qeveria teknike e zgjedhjeve. Nëse dikush mendon se socialistët nuk do të blekan vota nëse vjen qeveria teknike, meqenëse lekët i kemi ne, pse s’do i harxhonim? Apo do të na kursejë ai që do të vijë në krye të qeverisë teknike? E ka gabim!”, tha Majko. Për ish- kryeministrin, PS- ja nuk do të bëjë gabimet e së shkuarës. “Negociatë mes dy palëve, por kur njëra palë nuk do as negociata dhe as mirëkuptim, këtu nuk ka vend për negociata. Ne socialistët nuk do të bëjmë dy herë të njëjtin gabim, prandaj do të rregullojmë komunikimin me njerëzit, të shkojmë te njerëzit tek ata që na dhanë fitoren dhe do të na e japin përsëri. Ne nuk mbyllemi në çadër. Nuk duam të ndërtojmë Republikën e Çadrës. Jepni votën për PS- në. Do të punojmë 10 herë më tepër për detyrimin që kemi ndaj jush”, tha Majko.