Dekriminalizimi, hetim për Berishën dhe 12 deputetë
KQZ bashkon deputetët me krime me ata të gabimeve në emër
Komisioni Qendror i Zgjedhjeve do të riverifikojë formularët e vetëdeklarimit për 13 deputetë të Parlamentit të Shqipërisë dhe për 8 kryetarë bashkish në kuadër të ligjit të dekriminalizimit.
Në listën e deputetëve që mund të rrezikojnë mandatin është dhe emri ish- Kryeministrit Sali Berisha. Ky i fundit, sipas KQZ, nuk ka deklaruar në formular faktin se vite më parë ka ndryshuar emrin dhe datën e lindjes. Sipas një verifikimi të Gjendjes Civile, ish- kryeministri ka pasur në dokumente emrin “Salih”. “Më datë 28.09.2009 ka korrigjuar datëlindjen nga ‘ 01.07.1944’ në ‘ 15.10.1944’. Në regjistrimet e mëparshme të dhëna në rubrikën, emri rezulton të jetë ‘ Salih’”, thuhet në informacionin e dorëzuar në KQZ nga Zyra e Gjendjes Civile. Por Berisha e ka korrigjuar këtë të dhënë jashtë afatit ligjor, ndaj është përfshirë në listën e de- putetëve që mund t’u hiqet mandati për fshehje të të dhënave personale.
DEPUTETËT Në seancën e së enjtes, KQZ do të verifikojë mandatin e deputetëve të PD, Arben Ristani, Asllan Dogjani, Eduard Halimi, Florion Mima, Gjovalin Bzhetaj, Myqerem Tafaj. Po ashtu riverifikimit do t’i nënshtrohen edhe deputetët e Partisë Socialiste, Artan Gaçi, Xhemal Qefalia, Vladimir Kosta. Dhe dy deputetët e LSI- së, Spartak Braho dhe Ylli Shehu. Arben Ristani, Asllan Dogjani dhe Florion Mima nuk kanë deklaruar dënimet e formës së prerë të gjykatave për dënime me shpifje. Po ashtu dhe Spartak Braho nuk ka deklaruar një dënim për shpifje i dënuar me gjobë në vitin 1995. Për Brahon, KQZ ka dhe informacione nga Gjendja Civile se ka ndryshuar emrin. “Në aktin e lindjes nr. 258, datë 15.09.1951, emri rezulton ‘ Zylyftar’. Me procesverbal nr. 936, datë 21.12.1970, ndryshon emrin nga ‘ Zylyftar’ në ‘ Spartak’”, thuhet në informacionin e Gjendjes Civile. Po ashtu Artan Gaçi dhe Ylli Shehu kanë fshehur se janë dënuar për kontrabandë. Për riverifikim janë dhe 8 kryebashkiakë, mes të cilëve Tërmet Peçi dhe Adriatik Zotkaj, për të cilët ka kërkuar Prokuroria heqjen e mandatit.