Visar Zhiti: Nishani, persekutor dhe vegël e diktaturës së dikurshme
Përfaqësuesi diplomatik i Shqipërisë në Vatikan, poeti i njohur Visar Zhiti, e cilëson Nishanin një “hiç- president”, teksa komenton vendimin e tij për dekretimin e Fatmir Xhafajt si ministër. Në një reagim për “Gazetën Shqiptare”, Zhiti e fton presidentit të ikë sa më parë nga detyra. Në shkurt të vitit 2015, Presidenti Nishani refuzoi kandidaturën e Visar Zhitit si ambasador në Vatikan të propozuar nga Edi Rama. Megjithatë, Zhiti mori besimin e Ramës për të qenë i dërguari i Shqipërisë në Vatikan. “Larg vendit, përtej oqeanit, në kontinentin tjetër, ku shpreson të përthithësh paq qetësi ndryshe, ku ke shkuar për pushime e vizita mjekësore, zemër, tension, nerva etj., e ke këtë fat tani, je në Çikago, ku ende ka pllanga bore të pashkrira dhe pranvera të duket e ftohtë por e shëndetshme, gjithsesi nuk i shpëton dot ‘ lajmit’ të vendit tënd vogëlan e të varfër që të ka mashtruar, persekutuar e vrarë, po ti nuk i ndahesh, aq sa nuk të ndahet, e do sa nuk të do që, megjithëse ka ndryshuar shumë e ka bërë përpara, diktaturën e ka kthyer në demokraci, persekutorët në... nuk po flas, thjesht jam i goditur nga lajmi me president... Ja që edhe vendi im ka një president që s’i qe kujtuar të ishte por është e nuk i iket, fyes ndërkaq, se ikja e tij sa më parë i duhet vendit, një hiç- president, kështu thonë për të, që nuk i shpëton dot karikaturës së tij përndjekëse, klanit të tij, aq sa mizor, po aq dhe mediokër. Kështu thonë. Ai, gjoja president, flet për Kushtetutë, se kështu duhet kur në përmbajtje është kundërkushtetues, flet për rregulla demokratike kur ai është shkelje e tyre flagrante, flet për diktaturën e dikurshme kur është vegël e saj e mbetur, flet për të persekutuarit kur vetë është persekutor, edhe pse i paaftë. Dekoron pa ndërprerje, ngaqë e di që nuk kanë vlerë, nishane pa nishan, thonë. E si mund t’i përgjigjesh lajmit me Presidentin më absurd që vjen nga vendi yt i pakët? Që e emëruan ngaqë s’kishte emër, duhej ngaqë s’duhej. Poezinë, që nuk është antikushtetuese, po përdor ndaj së keqes...”, shkruan poeti Visar Zhiti.