Të përndjekurit, 9 milionë USD shtesë për dëmshpërblimin
Rihapet afati për aplikimin, do të përfitojnë 320 ish- të përndjekur
Rihapet afati për aplikimin e ish- të përndjekurve në skemën e dëmshpërblimit që u përjashtuan nga procesi në 2009- n.
Komisioni i Ekonomisë miratoi dje projektligjin për hapjen e afatit të aplikimit për dëmshpërblimin e ish- të përndjekurve politikë të kategorisë parësore, që u përjashtuan nga procesi në 2009- n. Pas ndryshimit të afatit në ligjin e ri, në skemën e dëmshpërblimit futen 320 ish- të përndjekur të kategorisë parësore, të cilët në bazë të ligjit të vitit 2009, u lanë jashtë mundësisë së aplikimit. Drafti i ri, që këtë javë i kalon për miratim seancës plenare, shtyn afatin ligjor për paraqitjen e kërkesave për dëmshpërblimet e kategorisë parësore për përfitim dëmshpërblimi deri më 31 dhjetor 2017. Përveç kësaj, ligji parashikon një lehtësi për kategori. Të gjitha kërkesat e paraqitura për përfitim dëmshpërblimi nga kategoritë parësore jashtë afatit ligjor, që ishte 1 korrik 2009, do të quhen të vlefshme. “Kërkesat për përfitimin e dëmshpërblimit, të paraqitura nga subjektet e kategorisë parësore jashtë afatit ligjor, i cili ka qenë 1.7.2009, konsiderohen të vlefshme. Ky parashikim është bërë me qëllim shmangien e burokracive dhe për të lehtësuar ish-- të dënuarit nga detyrimi për të mbledhur dhe paraqitur edhe një herë pranë Ministrisë së Drejtësisë dokumentacionin e kërkuar dhe kërkesën për të përfituar dëmshpërblim. Kërkesat për përfitimin e dëmshpërblimit financiar, të paraqitura nga subjektet e kategorisë parësore, jashtë afatit ligjor të parashikuar, konsiderohen të vlefshme”, thuhet në relacion. Pas miratimit të ligjit nga Kuvendi, në skemën e dëmshpërblimit do të shtohen 320 ish- të përndjekur, ku 293 aplikime i përkasin kategorisë “burg dhe izolim në hetuesi” dhe 27 aplikime kategorisë “izolim në institucion psikiatrik”. Efektet financiare të projektligjit në buxhetin e shtetit lidhen me dëmshpërblimin e ish- të dënuarve politikë të kategorisë parësore, të cilët do të përfitojnë dëmshpërblim si rezultat i rivendosjes në afat, përafërsisht 320 persona, në vlerën rreth 919.296.000 lekë. Vetëm për një këst, fatura financiare përllogaritet me vlerë rreth 114.912.000 lekë. Efektet financiare do të llogariten me buxhetin e vitit të ardhshëm. Qeveria, nga ana tjetër, ka gati procedurat për shpërndarjen e këstit të tetë të dëmshpërblimit për ish- të përndjekurit. Shpërndarja e parave pritet të mbyllet brenda muajit korrik.