Alarmohet Italia, Bonuçi në rrezik serioz për ndeshjen me Shqipërinë
“I kam treguar trajnerit si luan Ventura, duhet të sakrifikojmë shumë”
Njohuritë e Migjen Bashës për mënyrën se si e interpreton lojën trajneri i Italisë, Xhampiero Ventura, mund të rezultojnë shumë të rëndësishme në takimin e së premtes.
Lajm i mirë për Shqipërinë dhe mbi të gjitha për sulmuesin që do të luajë titullar. Leonardo Bonuçi është në rrezik për ndeshjen me kuqezinjtë, për shkak se ditën e djeshme nuk ka kryer seancë stërvitore me ekipin për shkak të gripit. Mbrojtësi i Juventusit dhe lideri i prapavijës së Italisë do të bëjë gjithçka për të mos e lënë në baltë ekipin e tij, por sipas mediave italiane, gjasat që ai të zbresë në fushën e lojës si titullar janë të pakta. Bonuçi dhe stafi i kombëtares italiane nuk duan të rrezikojnë, aq më tepër kur Juventusi bën shumë kujdes në këto raste dhe jep indikacione për futbollistët të kujdesen për shëndetin e tyre, sepse i duhen për ndeshjet e rëndësishme të sezonit si ato ndaj Barcelonës. Megjithatë, edhe nëse ai nuk ia del, atëherë vendi i tij do të plotësohet nga Romanjoli, Rugani ose Astori. Të tre mbrojtës shumë cilësorë, që do të bëjnë të mos ndihet mungesa e Bonuçit.
Formacioni - Një ditë më parë u mendua se Ventura mund të luajë me skemën 4- 2- 4, por duket se është rimenduar për të mos bërë eksperiment në një ndeshje të rëndësishme për fatin e kombëtares së tij. "Sportmediaset" shkruan se ish- trajneri i Torinos po mendon t'i rikthehet modulit klasik të viteve të fundit 3- 5- 2, që u perfeksionua nga Antonio Konte. Në mbrojtje bashkë me Barzaljin mund të jetë Rugani dhe Romanjoli, ndërsa pjesa tjetër e skuadrës nuk do të pësojë ndryshime. Me modulin e ri hapet një vend për një mesfushor, ku me gjasa do të ketë balotazh mes Parolos dhe Galjardinit.