Formularët jashtë afatit, Prokuroria heton KQZ- në
Kërkohet baza ligjore. Vendimi kolegjial nga 7 anëtarët
Ish- kryetarja e KQZ-së, Lefterije Luzi, dhe kryetari aktual Denar Biba pritet të thirren për të dhënë deklarime në Prokurorinë e Tiranës në lidhje me hetimin që ka nisur për ligjin e dekriminalizimit.
Nisja e hetimit të Prokurorisë ndaj KQZ- së është konfirmuar nga ana e Prokurorisë në mënyrë zyrtare në datën 16 shkurt 2017. Problematika që u bë shkak për nisjen e hetimeve ndaj KQZ- së u zbulua nga Prokuroria gjatë verifikimeve për ish- deputetin Armando Prenga, deputetin Artan Gaçi dhe kryetarin e Bashkisë së Tepelenës, Tërmet Peçi. Sipas Prokurorisë, në këto raste dhe në disa të tjera, KQZ kishte pranuar “plotësim apo korrigjim formulari përtej afatit që përcaktonte ligji i dekriminalizimit”. “Komisioni Qendror i Zgjedhjeve, për një deputet dhe për dy kryetarë bashkie ka pranuar dorëzimin e një formulari të dytë, tej afateve ligjore. Afati i dorëzimit të formularëve është brenda dy muajve nga data e hyrjes në fuqi të vendimit 17/ 2016. Afati i fundit për të gjitha subjektet ka qenë data 4.05.2016. Nga dokumentacioni i përcjellë rezulton se për këta tre subjekte, KQZ- ja, në kundërshtim me ligjin, ka pranuar një formular të dytë, me të dhëna shtesë, në qershor 2016”, thuhet nga Prokuroria. Sipas ligjit për dekriminalizimin, afati për dorëzimin e formularëve nga zyrtarët ka qenë data 22 prill 2016. Por, ndërkohë, pas kësaj date janë pranuar shtesa e korrigjime nga 21 zyrtarë e deputetë, dhe kjo ka ndodhur me një vendim kolegjial të 7 anëtarëve të KQZ- së. FORMULARËT JASHTË
AFATIT Sektori i Dekriminalizimit në Prokurorinë e Përgjithshme, pas konstatimit të problematikave në vendimet e veprimet e KQZ- së, ia ka kaluar dosjen Prokurorisë së Tiranës. Kjo e fundit pritet që në javët e ardhshme të marrë dëshminë e kryetarit aktual të KQZ- së, Denar Biba, dhe paraardhëses së tij, Lefterije Luzi. Nga ana tjetër, mësohet se Prokuroria e Tiranës, e cila po heton rastin, ka kërkuar shpjegime me shkrim nga ana e KQZ- së. Shpjegimet janë kërkuar për bazën ligjore e procedurale, që është përdorur për pranimin e plotësimeve e korrigjimeve të formularëve përtej afateve që janë përcaktuar në ligjin e dekriminalizimit. Mësohet se kërkesa për informacion në lidhje me këtë çështje i është kërkuar personalisht secilit prej anëtarëve të KQZ-së. Ky institucion, ndërkohë, është duke hartuar përgjigjen për Prokurorinë, ndërsa jozyrtarisht mësohet se plotësimi i formularit apo korrigjimi i tij është pranuar për zyrtarë të lartë, qofshin ata deputetë të Kuvendit nga maxhoranca e opozita, apo drejtorë në administratë. Sipas burimeve jozyrtare, mësohet se vendimi për pranimin e shtesave, korrigjimeve e plotësimeve të formularit në një afat të dytë, veç atij që përcakton ligji, ka qenë kolegjial, pra i miratuar nga shtatë anëtarët e KQZ- së. Po kështu, burimet kanë thënë se shtesat e formularëve dhe korrigjimet janë pranuar për deputetë të maxhorancës dhe opozitës, pra nga të dy krahët, pa favorizuar persona të veçantë.