Ministrat, maxhoranca provon numrat në Kuvend
Kërkohen minimumi 71 vota për të miratuar ministrat e rinj
Parlamenti do të votojë sot dekretet e Presidentit Nishani për katër ministrat e rinj të qeverisë Rama. Votimi i ministrave të rinj kërkon minimumin 71 vota, ndërkohë që maxhoranca ka arritur të marrë deri në 88 vota në disa votime të rëndësishme. Burime nga maxhoranca thanë dje se votat për miratimin e ministrave të rinj janë të garantuara, sepse përndryshe ai do të ishte një votim kundër qeverisë. Kur opozita ndodhet në ditën e 34- t të protestës së saj, duke kërkuar qeveri teknike, maxhoranca do të kalojë një provë konfirmimi të shumicës së thjeshtë të saj parlamentare që mban qeverinë në detyrë. Kryeministri Rama zëvendësoi Saimir Tahirin me Fatmir Xhafajn, Blendi Klosin me Olta Xhaçkën, Ilir Beqajn me Ogerta Manastirliun dhe Bledi Çuçin me Eduard Shalsin. Që nga dita e lirimit nga detyra të Saimir Tahirit nga Kryeministri Rama dhe propozimit në vend të tij të Fatmir Xhafajt, akuzat e opozitës ndezën debatin politik. Opozita akuzoi deputetin socialist se ka qenë hetues i Sigurimit të Shtetit gjatë periudhës së komunizmit, ndërsa i kërkoi Presidentit Nishani të qëndrojë në lartësinë e duhur për kandidaturat që Kryeministri Rama i ka dërguar për dekretim. Kreu i shtetit i dekretoi lirimet nga detyra të ministrave dhe emërimin e ministrave të rinj, por, si rrallëherë gjatë procedurës së dekretimit, ai bëri një argumentim për njërin nga ministrat. Presidenti Nishani e cilësoi të papërshtatshëm kandidaturën e Fatmir Xhafajt, por tha se nuk ia lejon Kushtetuta që ta refuzojë, ndërsa i propozoi Parlamentit që të bëjë një hetim parlamentar ndaj tij. Edhe ky qëndrim i Presidentit nuk kaloi pa komente nga ana e konstitucionalistëve. Sot kandidaturat do të votohen në Kuvend dhe aleati kryesor i PS-së, LSI- ja, ka shprehur vlerësime për aktivitetin parlamentar të Fatmir Xhafajt. Kreu i Grupit Parlamentar të LSI- së, Luan Rama, vlerësoi punën e Xhafajt në krye të Komisionit të Ligjeve, duke lënë të kuptohet se nuk ka asnjë refuzim për këtë kandidaturë. Arsyet e dhëna nga Kryeministri për largimin e katër ministrave nga detyra kishin të bënin me problematikën elektorale, për t’u dhënë më shumë kohë ish- ministrave që të merren me fushatën zgjedhore, pasi ata janë drejtues politikë të PSsë në krye të disa qarqeve.