Hetimi për pasurinë e Balilit, te familjarët
TIRANE - Biznesmeni që mbante postin e drejtorit të Shërbimit të Transportit në Sarandë deri një vit më parë po hetohet në dy drejtime nga Prokuroria e Krimeve të Rënda. Në njërën anë, Prokuroria po vlerëson provat e ardhura me letërporosinë e parë nga Greqia, në lidhje me akuzat për trafikim droge. Prokuroria e Krimeve të Rënda ka lëshuar urdhrin e ekzekutimit të vendimit penal nr. 426, datë 09.12.2016, për caktim mase sigurimi "arrest me burg" për shtetasin Klement Balili, i dyshuar për kryerje të veprave penale "trafik i narkotikëve", "krijim i grupit të strukturuar kriminal" dhe "kryerje e veprave penale nga organizata kriminale dhe grupi i strukturuar kriminal", kanë bërë me dije burimet zyrtare. Nga ana tjetër, po hetohen pasuritë e Klement Balilit, ku të dhënat janë të vakëta. Deri tani, në emër të personit të kërkuar kanë rezultuar vetëm një objekt banimi në fshatin Sjar të Delvinës dhe një llogari rrjedhëse në bankë, ku i dyshuari tërhiqte pagën si drejtor i Transportit në Sarandë deri një vit më parë. Për këtë arsye, Prokuroria ka zgjeruar hetimin për rrethin e dytë e të tretë të familjarëve të Klement Balilit ( rreth 40 vetë) me dyshimin se pasuri të mundshme janë transferuar tek ata.