Policia gjen kokainë e hashash në dhomën e hotelit
Policia e Tiranës tha dje se personat e dyshuar si organizatorë të këtij aktiviteti, Maria Th. dhe M. Çela, kanë ndërmjetësuar për të ushtruar prostitucion te shtetasja T. Gj. Policia kishte disa ditë që po gjurmonte dy tutorët dhe mbrëmjen e së hënës është gjetur momenti i përshtatshëm për të ndërhyrë, në mënyrë që të bëhej arrestimi në flagrancë. Burimet thanë se më datë 20 mars, rreth orës 23: 00, 27vjeçarja T. Gj. është kapur në flagrancë në ambientet e një hoteli në periferi, duke ushtruar prostitucion në grup, me klientët R. Zh., D. H. dhe K. Zh. Ndërsa në dhomë u gjetën 2 doza kokaine e një dozë hashashi, si dhe pajisjet për përdorimin e drogës, që u sekuestruan në cilësinë e provës materiale. Burimet thanë se pronari i hotelit ku u kryen arrestimet nuk ka pasur dijeni se aty ushtrohej prostitucion. Personat kishin marrë tri dhoma, për të mos rënë në sy te sportelisti, por më pas ishin futur të katërt në njërën dhomë, aty ku edhe u arrestuan. Madje, njëri prej klientëve pati edhe një përplasje me efektivët e Policisë, duke kundërshtuar arrestimin.