Nga lista e Lezhës te deputetët e Vlorës, kë preku dekriminalizimi

KQZ, që nga miratimi i ligjit të dekriminalizimit, ka marrë vendim për heqjen e mandateve vetëm për tre zyrtarë të lartë. Megjithatë, lista e zyrtarëve të lartë të prekur nga ligji është edhe më e gjatë. Në dhjetor të vitit 2016, me kërkesë të Prokurorisë së Përgjithshme, KQZ vendosi t’u hiqte mandatet deputetit të PDIU-së ( pjesë e grupit të PD) Dashamir Tahiri, deputetit të LSI-së, Shkëlqim Selami, dhe kryebashkiakut të Kavajës, Elvis Rroshi. Kryetari i KQZ- së, Denar Biba, deklaroi në atë kohë se ligji nuk e përcaktonte siç duhej rolin që institucioni i drejtuar prej tij duhej të mbante, por për aq kohë sa ishte Prokuroria që e kërkonte mbarimin e mandatit, vendimmarrja për heqjen e mandateve u miratua. Më herët, pas miratimit të ligjit të dekriminalizimit, në vitin 2015, kishte dhënë dorëheqjen ish- deputeti socialist, Arben Ndoka. Por pavarësisht disa dorëheqjeve, akuzat e opozitës në lidhje me individët e inkriminuar në radhët e maxhorancës do të vijonin. Pas akuzave të vazhdueshme, lidhur edhe me përfshirjen e tij në një përplasje të armatosur në Laç, në vitin 2015, në shkurt të këtij viti dha dorëheqjen edhe deputeti Armando Prenga. Opozita e cilësoi largimin e Prengës një tjetër sukses të sajin, ndërkohë që për Partinë Socialiste largimi i tij u hiqte socialistëve një mandat në Lezhë. I vetmi kandidat i ngelur nga lista e deputetëve të PS në Lezhë ishte Kastriot Piroli. Por edhe Piroli, për shkak të një- dy dënimeve të marra për shpërdorim detyre, ishte subjekt i ligjit të dekriminalizimit dhe nuk mund të merrte mandatin. Piroli, njësoj si disa deputetë të tjerë të maxhorancës, vendosi të refuzojë marrjen e mandatit në KQZ, duke dhënë dorëheqjen prej tij. Mandati i socialistëve në Lezhë i kaloi Petrit Gjonit, i cili ka kandiduar në zgjedhje nën logon e Lëvizjes Socialiste për Integrim.