Basha nga SHBA: S’ka zgjedhje pa opozitën, mora mbështetje
Kreu i PD: Lobistët e paguar me paratë e narkomafies shqiptare veprojnë në Uashington e Bruksel për të keqinformuar aleatët
Kryetari i opozitës, Lulzim Basha, nga Shtetet e Bashkuara ka deklaruar se ka marrë mbështetje nga administrata e Presidentit Trump për kauzën e zgjedhjeve të lira dhe të ndershme.
Në një intervistë për “Zërin e Amerikës”, Basha ka ritheksuar qëndrimin se zgjedhje fasadë nuk do të ketë më 18 qershor, nëse Edi Rama më parë nuk do të japë dorëheqjen dhe nuk do të formohet një qeveri teknike.
Le të ndalemi fillimisht te synimi i kësaj vizite, për të cilën ishit këtu në Uashington.
Po, jam i ftuar këtu, jam mirëpritur nga udhëheqësit republikanë të Kongresit dhe të Senatit. Kam takuar krerët e komisioneve relevante, Komisionit të Jashtëm, të Komisionit të Sigurisë Kombëtare, një numër të madh senatorësh dhe kongresmenësh të cilët merren drejtpërdrejt me politikën e jashtme të Shteteve të Bashkuara, si edhe bashkëpunëtorë të nivelit të lartë të administratës Trump, ku kemi diskutuar për gjendjen në Shqipëri, për zhvillimet politike në Shqipëri, për impaktin që ka kriza politike dhe në veçanti krimi i organizuar, paratë e drogës dhe influenca e tyre mbi procesin politik në Shqipëri, jo thjesht për popullin shqiptar dhe Shqipërinë, por për rajonin në tërësi dhe interesat gjeostrategjike të Shqipërisë dhe Shteteve të Bashkuara të Amerikës. Dua të ndaj sot me kënaqësi të jashtëzakonshme nga kjo studio e juaj lajmin e shkëlqyer me qytetarët shqiptarë, jo thjesht me protestuesit të cilët i përshëndes këtu nga Uashingtoni nga studio e “Zërit të Amerikës”, lajmin për mbështetjen që kam marrë nga të gjithë bashkëbiseduesit nga të gjitha nivelet e administratës Trump, të Kongresit dhe të Senatit, për kauzën e drejtë të zgjedhjeve të lira dhe të ndershme, dhe për betejën e qytetarëve shqiptarë për të mos lejuar asnjë standard tjetër, përveç standardit europian dhe euroatlantik në procesin e ardhshëm zgjedhor.
Çfarë prisni ju nga zyrtarët amerikanë? Çfarë ndihme prisni prej tyre?
Jo, nuk presim zgjidhjen nga të huajt, sepse po të prisnim zgjidhje nga të huajt nuk do të ishim në këtë ditë të 35të të një proteste të paprecedentë, non stop. Ka rëndësi informimi ashtu siç duhet i qendrave kryesore të aleatëve tanë strategjikë, të Uashingtonit, të Brukselit dhe partnerëve tanë, sepse për fat të keq me futjen edhe të parave të narkomafias shqiptare është investuar fuqishëm në keqinformimin si të publikut ndërkombëtar, ashtu edhe të qendrave të vendimmarrjes politike. Prania ime këtu është një prani në vazhdim. Unë kam qenë këtu para disa javësh me rastin e inaugurimit të Presidentit Trump.
A e vini ju në dyshim mënyrën se si funksionon qeveria amerikane, ka një ambasadë jo të vogël në Shqipëri?
Jo, nuk ka të bëjë kjo, sepse është çështje e komunikimit diplomatik midis ambasadës dhe Departamentit të Shtetit. E kam fjalën për lobistët e paguar me paratë e narkomafias shqiptare të cilët veprojnë në Uashington, në Bruksel, në Berlin, në Londër, për të fshehur të vërtetat e hidhura të Shqipërisë dhe për të keqinformuar aleatët tanë. Për fat të mirë, një nga meritat e mëdha të protestës së 18 shkurtit që vazhdon, është që është çjerrë kjo vello e paguar me paratë e drogës dhe narkomafias shqiptare.
Kërkesa juaj për qeveri teknike është hedhur poshtë nga kryeministri. Nëse nuk plotësohet kërkesa juaj, a do të merrni pjesë në zgjedhje?
Nuk do të ketë zgjedhje pa opozitën dhe nuk do të lejojmë, as opozita, as qytetarët, zgjedhje fasadë, zgjedhje farsë.
Më falni, nuk do të ketë zgjedhje pa opozitën, nuk e përcaktoni ju?....
Sigurisht, këtë e përcaktojnë qytetarët shqiptarë. Qytetarët shqiptarë kanë folur qartë më 18 shkurt. Po flasin ditë për ditë dhe natë për natë, pa censurë, nga ai shesh i lirisë.
A mendoni se ka mekanizma PD- ja për t’i bllokuar zgjedhjet?
Sigurisht që po. Të gjitha mekanizmat paqësore për të mos lejuar një proces farsë dhe këto mekanizma ne do t’i shpalosim hap pas hapi në varësi të situatës politike në vend. E sigurt është një gjë dhe ky është një mesazh i qartë që sot e përsëris nga Uashingtoni: zgjedhje me krimin, zgjedhje me drogën, zgjedhje me Edi Ramën Kryeministër nuk do të ketë.
Dakord me ju, ndahem teknikisht, por zgjedhjet mund të organizohen nga institucionet përkatëse, KQZ, qeveria etj. Nëse zgjedhjet zhvillohen, a do të marrë pjesë PD- ja apo jo?
Nuk do të zhvillohen zgjedhjet. Unë ju garantoj që zgjedhje fasadë nuk do të ketë. Nuk mund të ketë një proces demokratik, votime po, ka pasur 50 vjet votime në Shqipëri, por nuk ishin zgjedhje. Por kishte? Votime po, zgjedhje jo. Pasojat janë të tjera gjëra, por votime mund të zhvillohen.
Proces farsë në Shqipëri nuk mund të zhvillohet, ky është zotimi ynë. Dhe së bashku me qytetarët shqiptarë jemi të gatshëm të ndërmarrim të gjitha veprimet demokratike dhe paqësore.
Pra, ju nuk pranoni të thoni që nëse zgjedhjet do të zhvillohen nuk do të merrni pjesë?
Jo, e kam sqaruar njëherë e mirë këtë. Nuk do të ketë bojkot, por nuk do të ketë zgjedhje të diktuara nga krimi dhe nga droga.
Nuk do të zgjedhje se e keni ju në dorë... nëse do të ketë zgjedhje, qoftë edhe nga ato që mund të jenë farsë, ju do të merrni pjesë apo jo?
Nëse ka përpjekje për zgjedhje fasadë, PD- ja dhe qytetarët do të bëjnë atë që i takon çdo shoqërie të civilizuar; do të ndalë një maskaradë të tillë dhe do t’u japin shqiptarëve në një mënyrë apo në një mënyrë tjetër zgjedhje të lira dhe të ndershme. Nuk mund të ketë bojkot sepse nuk mund të ketë zgjedhje fasadë, zgjedhje me krimin, edhe një herë e përsëris. Është me rëndësi që këtë mesazh e jap sot, në këtë ditë të 35- të të protestës dhe e jap këtu nga Uashingtoni pas takimeve me krerët më lartë, me udhëheqësit më të lartë të Kongresit, të Senatit.