Kryemadhi insiston me kritika për Qeverinë: Të harrojmë fasadat
Deputetja e Lëvizjes Socialiste për Integrim, Monika Kryemadhi, ka kritikuar dje qeverinë duke thënë se ka harruar nevojat kryesore të qytetarëve, por e përqendron vëmendjen në debat politik për pseudoreformat. Pas një takimi të zhvilluar në fshatrat e Librazhdit, Kryemadhi ka shpërthyer me një status në “Facebook”, ku ka thënë se në këto zona s’ka as rrugë, as infrastruktura dhe as ujë të pijshëm. “Të mendosh që nuk ka rrugë, infrastrukturë dhe ujë të pijshëm, megjithëse ujin nuk ta jep politika, por Zoti. Janë disa detyrime që ne në politikë i kemi harruar, pasi përfshihemi nga debatet politike apo nga disa pseudoreforma, qofshin këto arsimore, drejtësie apo shëndetësie, dhe harrojmë gjërat më jetike për të cilat njerëzit kanë nevojë. Duhet të harrojmë fasadat e jashtme dhe të mendojmë për ato gjëra që janë të përditshme për banorët, qytetarët, fshatarët, malësorët”, tha Kryemadhi. Deputetja e LSI- së ishte dje e pranishme në prezantimin e studimit të fizibilitetit të ujësjellësit të ri në Rrajcë të Përrenjasit. Bëhet fjalë për një projekt, nga i cili do të përfitojnë ujë të pijshëm 6844 banorë të fshatrave Kovanik, Skënderbej, Gjashtëliz, Rrëzë, Sutaj dhe Rrajcë. Investimi për këtë ujësjellës kap vlerën 3.233.790.000 lekë. Rreth 70% e kësaj vlere mbulohet nga banka gjermane KfË, 20% nga Fondi Shqiptar i Zhvillimit dhe 10% nga Bashkia Përrenjas. Duke folur për mediat pas këtij takimi, Kryemadhi tha se bëhet fjalë për një investim që u jep entuziazëm dhe shpresë banorëve të komunës Rrajcë, e cila është një nga zonat më të bukura të Përrenjasit. “” Për herë të parë vij këtu dhe me thënë të drejtën kur po vija rrugës shikoja mundësitë shumë të pakta që ka Bashkia e Prrenjasit për t’u shërbyer qytetarëve, duke pasur parasysh që është pothuajse një nga bashkitë më të varfra që ka Shqipëria. Por ky projekt u jep një lloj entuziazmi banorëve të komunës Rrajcë, të cilës të mendosh që është një nga zonat më të bukura, por edhe më të varfra. Mungesa e ujit, mungesa e infrastrukturës, e bën më të lodhur e më të drobitur si zonë, por ky projekt ishte si një lloj shprese që u jepej banorëve dhe shpresoj që sa më shpejt të realizohet”, ka thënë Kryemadhi.