Rama me peshkatarët premton bursë peshku
Kryeministri në drekë në një nga varkat e peshkimit
Efektet e ligjit për akcizën e peshkimit, përmes të cilit rimbursohen peshkatarët me naftë, Kryeministri Rama i diskutoi në një drekë informale me peshkatarë në portin e Durrësit. Gjatë diskutimit me peshkatarët, Kryeministri Rama kujtoi një takim të zhvilluar tri vite më parë dhe gjendjen në të cilën ishte peshkimi në Shqipëri. Sipas Ramës, pavarësisht asaj që është bërë në këto 3 vite, perspektiva për zhvillimin e sektorit të peshkimit lidhet me projektin e portës, krijimit të një markate europiane për tregtimin peshkut dhe fuqizimin e flotave. “Fakt është që sot kemi afërsisht 4000 tonë prodhim që janë të deklaruara dhe që kanë shkuar në tregun e brendshëm dhe në eksport. Fakt është që sot kemi rreth 1000 punonjës të rinj në këtë sektor. Fakt është që sot për komunitetin e peshkimit në Shqipëri, rregullat e lojës janë njësoj, jo siç ishin përpara me atë historinë e naftës, që ishte një histori e tmerrshme. Tani na duhet të shohim përpara se do të bëjmë një markatë peshku europiane, bursën e peshkut, dhe patjetër që duhet të fuqizojmë flotat”, tha Rama. Gjatë drekës Rama dhe peshkatarët kanë shkëmbyer batuta mes tyre. Një prej peshkatarëve i kërkoi kryeministrit të ndërhyjë për të zhbllokuar një anije të bllokuar në Egjipt. Sipas peshkatarit, autoritetet në Egjipt kërkojnë 50 mijë euro, ndërkohë që vlera e varkës është 30 mijë euro. Kryeministri pas këtij apeli ka telefonuar ministrin Bushati, duke i kërkuar zgjidhjen e çështjet. Gjatë vizitës së tij në Durrës, Rama ka inspektuar edhe nënstacionin elektrik të rikonstrukturuar në zonën e Golemit, i cili pritet të ndryshojë situatën nga zona e “Plepave” deri në “Shkëmbin e Kavajës” dhe Golem sa i takon furnizimit me energji elektrike.