Leskaj: Marrëdhëniet me Parlamentin duhet të kalojnë në fazë të re
Në prezantimin e marrëdhënieve Kontrolli i Lartë i Shtetit- Parlament, kryetari Bujar Leskaj vuri dje në dukje marrëdhëniet e mira të bashkëpunimit që ka KLSHja me Parlamentin dhe Komisionin e Ekonomisë dhe të Financave. Gjatë seminarit “Marrëdhëniet SAI- Parlament” kryetari i KLSH-së Leskaj pohoi se ky bashkëpunim u evidentua veçanërisht me miratimin e ligjit të ri integral të Kontrollit të Lartë të Shtetit. “Frytin kryesor të bashkëpunimit eficient me Kuvendin do të konsideroja produktin dhe të gjithë punën e bërë për miratimin e ligjit integral të institucionit, i cili u përfundua në tetor të vitit 2014, ku si KLSH-ja dhe Kuvendi realizuan një bashkëpunim shembullor. Në veçanti Komisioni për Ekonominë luajti një rol parësor për miratimin e ligjit modern për KLSH- në, ku nga segmente të caktuara u penguam për një vit”, tha Leskaj. Kryetari i Kontrollit të Lartë të shtetit Leskaj kërkoi që marrëdhëniet KLSH- Komision duhet të kalojnë në një fazë të re, atë të ndjekjes dhe zbatimit të rekomandimeve të KLSH- së, çka kërkohet edhe në rekomandimet e progresraporteve të BE- së për Shqipërinë. “Vetëm përgjatë vitit 2016 e deri në mars 2017, KLSH-ja i ka dërguar Parlamentit ( kryetarit të Kuvendit dhe komisioneve parlamentare) 13 raporte auditimi. Sfida jonë më e madhe në raportet konstruktive dhe të hapura me Kuvendin është bashkëpunimi konkret për ndjekjen e zbatimit të rekomandimeve të KLSH- së, çka është një kërkesë e progresraporteve të BE- së. Jemi të ndërgjegjshëm që kemi shumë punë për të bërë që ky bashkëpunim të funksionojë”, përfundoi Leskaj.