Gomonia me 1.2 tonë drogë, kufomë në det afër Sazanit
Identifikohet peshkatari, dyshohet si i përfshirë në trafik
Trupi i pajetë i një 57vjeçari u gjet nga peshkatarët të premten rreth një milje në afërsi të ishullit të Sazanit.
Pas sinjalizimit të dhënë, në drejtim të ishullit të Sazanit, në pjesën veriore të tij ku edhe u gjet kufoma, u nisën efektivë të Policisë dhe rojës bregdetare. Ata bënë të mundur nxjerrjen e trupit nga uji dhe transportimin për në morgun e qytetit. Gjatë ekspertizës për identifikimin e viktimës, të afërmit e tij e kanë dalluar atë nga rrobat që mbante veshur, të cilët konfirmuan se bëhej fjalë për Numan Lazajn. 57- vjeçari Lazaj nga Kanina e Vlorës rezulton se punonte gjithashtu si peshkatar. Ai ishte baba i tre fëmijëve. Do të jetë ekspertiza mjekoligjore ajo që do të përcaktojë edhe më tej shkaqet e vdekjes së Lazajt. Paraprakisht dyshohet se ai ndodhej në gomonen që u gjet e braktisur në afërsi të ishullit të Sazanit, më datë 12 mars, me një sasi të konsiderueshme lënde narkotike, rreth 1.2 tonë. Gomonia u gjet e përplasur në shkëmbinjtë e ishullit, ndërsa për shkak të motit të keq dhe përplasjes nga mjeti lundrues, në det kishin përfunduar edhe disa pako kanabis. Gjithashtu, rezultoi se gomonia kishte humbur edhe një nga motorët. Pas operacionit, Policia ngriti dyshime për zhdukjen e dy personave që kishin qenë në bordin e saj gjatë tentativës për trafikimin e drogës drejt Italisë. Gjetja e kufomës gjatë ditës së djeshme dyshohet se i përket pikërisht një prej personave që ndodheshin në gomonen me 1.2 tonë kanabis, ndërsa ende nuk dihet fati i personit të dytë. Por, mbi këtë hipotezë pritet të hedhë dritë ekspertiza mjekoligjore, e cila do të përcaktojë edhe shkaqet e vdekjes që mund te kenë ardhur si shkak i rrëzimit nga mjeti lundrues dhe të jetë mbytur në det, apo nëse ka plagë në trup, të cilat mund të çojnë në një tjetër version të hetimeve. Policia e Vlorës konfirmon se ka pasur gjatë kësaj periudhe deklarime dhe denoncime nga persona të ndryshëm, për familjarë të zhdukur. Dyshohet që mes denoncimeve të bëra, të kemi raste të personave të cilët mund të jenë mbytur edhe gjatë tentativës për trafik të lëndëve narkotike drejt Italisë. Rastet janë rreth 14 deri më tani në Policinë e Vlorës, ndërsa emrat nuk bëhen të ditur nga uniformat blu, pikërisht për shkak të hetimeve që janë duke u zhvilluar nga Policia. Viktima e djeshme është pikasur nga peshkatarë të tjerë, të cilët kanë parë trupin teksa pluskonte në det.