Basha kthehet në çadër: Ndihmë nga ekipi fitues në SHBA

“Në zgjedhje vetëm me qeveri teknike”

Pas kthimit nga vizita në Shtetet e Bashkuara të Amerikës, Lulzim Basha i është drejtuar dje çadrës së protestës, duke i përcjellë përkrahësve të PD- së tri mesazhet që ka marrë nga takimet në Uashington.

Kreu i PD- së tha se ka marrë mbështetje totale nga miqtë amerikanë për kauzën e zgjedhjeve të lira, gjithashtu njoftoi se PD- ja do të asistohet nga ekspertët e fushatës së Donald Trump. Basha tha se kauza e PD- së ka hyrë në një fazë të rëndësishme dhe ajo do të përfundojë kur të largohet Edi Rama dhe të krijohet qeveria teknike. “Është mesazhi i mbështetjes totale të miqve tanë. Mbështetjes politike, mbështetjes parimore dhe morale dhe po mbështetjes së gjithanshme për Partinë Demokratike të Shqipërisë nga ekipi fitues i Presidentit Trump, jo vetëm për këtë betejë, por edhe për zgjedhjet që do të vijnë, për zgjedhje të lira e të ndershme, me një qeveri teknike. Partia Demokratike dhe opozita shqiptare do të kenë ekspertizën dhe ndihmën e ekipit fitues në zgjedhjet e Shteteve të Bashkuara të Amerikës. Beteja jonë ka hyrë në një fazë vendimtare. Në fazën kur vendosmëria, kuraja dhe besimi në kauzën e zgjedhjeve të lira dhe të ndershme do të përcaktojnë të vetmin përfundim të kësaj beteje. Ka një dhe vetëm një përfundim. Largimin e Edi Ramës, një qeveri teknike që do të garantojë zgjedhje të lira dhe të ndershme”, tha dje Basha. Lideri i demokratëve tha dje se kauza e opozitës ka fituar mbëshetje të gjerë si në Uashington, në Bruksel dhe në mbarë politikën botërore. Sipas tij, beteja do të fitohet bashkë me Europën dhe SHBA- të. “Me forcën tuaj, me bekimin e Zotit dhe me ndihmën e miqve tanë amerikanë, ne patjetër do t’ia dalim. Kam ardhur me zemrën plot, me besim në fitoren e jashtëzakonshme të kauzës sonë, në Uashington, në Bruksel dhe anembanë botës së lirë dhe demokratike, dhe dua ta ndaj me ju, bashkëluftëtarët e kësaj beteje, besimin tonë total se kësaj beteje që i kemi dhënë zemrat tona, shpatullat tona, prej ditës së parë do t’i dalim në krye do ta fitojmë për Shqipërinë, do ta fitojmë për

Europën, për Shtetet e Bashkuara të Amerikës”, tha dje Basha. MESAZHET Dy mesazhet e tjera që Basha i përcolli çadrës së protestës ishin përkrahja dhe falënderimi, që sipas tij senatorët e SHBA- ve dhe administrata e Trump i ka bërë modelit qytetar të protestës së zhvilluar në Shqipëri. “Nga takimi im i parë, mbrëmjen e së martës deri tek takimi i fundit, pasdrekën e së premtes, me përfaqësuesit më të lartë të Partisë Republikane, të Senatit të Shteteve të Bashkuara të Amerikës, të Kongresit Amerikan dhe po, të bashkëpunëtorëve të Presidentit Trump në Shtëpinë e Bardhë, mesazhi i parë është mesazhi i përgëzimit për qytetarët shqiptarë, për këtë qëndresë të jashtëzakonshme, për këtë zgjim, për këtë kauzë të madhe, që i ndan kombet në të civilizuara dhe të pacivilizuara, në të lira dhe në të robëruara, në të forta dhe në të dobëta, në liridashëse dhe të nëpërkëmbura: kauzën e zgjedhjeve të lira dhe të ndershme, kauzën e demokracisë, kauzën e lirisë. Përgëzimet vijnë drejtpërdrejt, jo për mua por për gjithsecilin prej jush që jeni në këtë betejë epike, historike, që do të ketë vetëm një përfundim, fitoren tuaj, fitoren e Shqipërisë, fitoren e demokracisë. Mesazhi i dytë i sinqertë që buron drejtpërdrejt jo nga kalkulimet politike të aleatëve tanë strategjikë, por nga bindja e tyre më e thellë e këtij brezi drejtuesish dhe politikanësh në Kongres, në Senat, në Shtëpinë e Bardhë dhe dhjetëra brezave para tyre, të cilët e dinë fare mirë kuptimin e kësaj lufte në historinë e tyre, pra mesazhi i dytë që ua kam premtuar bashkëbiseduesve të mi, politikanëve më të lartë të Shteteve të Bashkuara të Amerikës që takova në Uashington se do ta përcjell besnikërisht këtu në këtë çadër është: falënderimi për ju!”, ka deklaruar dje ai.