Sejko: Trajektorja e rritjes ekonomike është pozitive
Guvernatori i Bankës së Shqipërisë, Gent Sejko, mori pjesë në Uashington në Mbledhjet e Pranverës të Fondit Monetar Ndërkombëtar dhe Bankës Botërore. Gjatë pjesëmarrjes në Mbledhjet e Pranverës të FMN- së dhe BBsë, guvernatori i Bankës së Shqipërisë, Sejko, zhvilloi disa takime të rëndësishme me personalitete të njohura të fushës financiare ndërkombëtare, ku i njohu të pranishmit me zhvillimet më të fundit në ekonominë shqiptare, duke u ndalur në perspektivën e rritjes ekonomike, si dhe në zhvillimet e sektorit bankar. Guvernatori Sejko theksoi se rritja ekonomike e vendit është në një trajektore pozitive zhvillimi. Rritja ekonomike pritet të vijë në përmirësim dhe balancat kryesore ekonomike do të forcohen gjatë viteve të ardhshme. Në lidhje me zhvillimet e fundit në ecurinë e çmimeve të kon- sumit, Sejko theksoi se ecuria e inflacionit në vlerat aktuale po kthehet gradualisht në nivelin e synuar. Lidhur me sistemin bankar në vend, guvernatori Sejko nënvizoi se trajtimi i çështjes së kredive me probleme ka qenë një ndër angazhimet e Bankës së Shqipërisë, i shoqëruar me një plan veprimi të mirëmenduar për reduktimin e tyre. Zbatimi i këtij plani ndihmoi në zbritjen e nivelit të kredive me probleme në rreth 18%. Bisedimet e takimeve u ndalën, gjithashtu, në masat e marra nga Banka e Shqipërisë, të mbështetura nga politika monetare stimuluese, me qëllim nxitjen e kreditimit në vend. Guvernatori theksoi se këto masa i kanë dhënë efektet e tyre duke ndikuar në uljen e çmimit të kredisë në të gjitha segmentet e tregut financiar në vend. Një tjetër çështje me rëndësi e diskutuar ishte angazhimi i Bankës së Shqipërisë në bashkëpunim me institucionet e tjera në vend, për rritjen e përdorimit të monedhës vendase në ekonominë shqiptare. Guvernatori Sejko i njohu zyrtarët e lartë ndërkombëtarë lidhur me Memorandumin e Bashkëpunimit të nënshkruar nga Banka e Shqipërisë, Ministria e Financave dhe Autoriteti i Mbikëqyrjes Financiare, i cili ka si qëllim kryesor përmirësimin e efektivitetit të politikës monetare dhe uljen e rreziqeve për stabilitetin financiar dhe politikën fiskale. Gjatë këtyre takimeve, përfaqësuesit e lartë të FMN- së dhe BB-së vlerësuan punën e bërë nga Banka e Shqipërisë në drejtim të ruajtjes së stabilitetit makroekonomik dhe financiar të vendit. Në këndvështrimin e tyre, Banka e Shqipërisë është një partner serioz dhe profesional në përmbushjen e detyrave të saj. Ata shprehën gatishmërinë për të vazhduar më tej bashkëpunimin dhe asistencën teknike për institucionin tonë. Më tej, zyrtarët e lartë ndërkombëtarë theksuan se sistemi bankar në Shqipëri është i konsoliduar. Gjithashtu, një element i një rëndësie të veçantë për ekonominë, i nënvizuar gjatë diskutimeve nga ana e tyre, ishte vazhdimi i reformave dhe stabiliteti politik i vendit.